英格蘭分組賽最後一戰有驚有險之下贏咗烏克蘭，領隊鶴臣隨即開始備戰下周日對意大利嘅8強賽，希望可以繼96年之後，再次打入準決賽。有英國傳媒報道，鶴臣為免英格蘭重蹈近年在大型賽事逢射12碼必輸嘅覆轍，已安排球員勤練12碼。
22年5次輸12碼出局
鶴臣提早練射12碼亦無可厚非，除各大賭波公司開英、意戰嘅和波賠率係4場8強賽中最熱，普遍預計呢場波嘅和波機會好高，翻查紀錄，原來英格蘭過去22年喺世界盃同歐國盃決賽周，曾有5次互射12碼被淘汰。鶴臣亦好坦白咁講：「由於英格蘭以往互射12碼成績唔理想，過去射12碼嘅成績會令球隊嘅擔子越來越重，所以要早啲準備。」
至於上場對烏克蘭受傷嘅艾舒利楊格，經治療後已經復操，如無意外可以趕及對意大利時候命。而英格蘭足總發言人噚日話，英格蘭22名球員已經全部復操。早前返英國為父親舉殯嘅前鋒迪科爾，今日就會歸隊。