任總發表大塊文章講「香港金融制度之未來」，震動特區政府，反而金融市場就冇乜反應，一切如常，可見得政治人物驚咗任總，但金融市場夠成熟冷靜，冇有怕。全世界都知道曾蔭權一日在位，聯繫匯率不會改，七月一日之後，梁振英上台，佢對金融係門外漢，邊度夠膽改呀，最好大家都唔講呢樣嘢，梁特首先至會覺得安樂。
任總話文責自負，全無政治考慮，寫文冇問過其他人意見，總之寫咗成年，寫好就無謂攤凍，趁熱食，於是文章完成之後，就以中文大學環球經濟金融研究所之第九號工作報告（WorkingPaperNo.9）向外發佈，左報與明報社評指任總文章有三不當，已非任總事先考慮之列。
聯繫匯率這回事，自一九八三年十月實施以來，成為香港聖牛，任何人觸碰之，政府都會唔高興，上次歐智華在港見記者無端端講到港元應與人民幣掛鈎之後，不少銀行界財資部與經濟研究部高層立即收到電話，叫佢地唔好公開評論，於是全部人收口。銀行界高層全部知道，金管局唔會鼓勵任何有關改變聯繫匯率之討論嘅，任總文章未正式發佈，陳總已經現身反駁，可見任總雖然話自己人微言輕，其實餘威猶在。
本欄讀者知道左丁山長期主張廢除聯繫匯率，任總離開金管局三年後，竟然鼓起勇氣改變在任時嘅講法──話聯繫匯率制度可以討論吓，打破禁忌，左丁山自然歡迎。對小市民嚟講，怎麼樣優化聯繫匯率，捍衞聯繫匯率，講到天光都唔明白。但九七金融風暴之後，鄰近亞洲國家相繼貶值，唯獨美元帶動香港升值，不能與人競爭，於是要透過整體成本架構向下調整嚟維持競爭力，反映於現實，就係失業率上升，工資下降，資產價格（房地產及股票）大幅度下滑，結果為香港帶來十年通縮，要靠2004年自由行配合到，先至復甦。今次周期剛好相反，於是通脹上升，資產價格上升，無產階級嘈到政府失魂。如果因為顧慮到任總身份而不再討論聯繫匯率存廢，繼續堅持不變嘅話，好呀，唔炒樓炒股直至爆煲為止先至奇！