【我得寵】養動物的人最怕見到小動物被遺棄或被虐待的新聞，所以在訪問過程中，林一峰不停重複說：「一定要做個負責任嘅主人。」林一峰起初只養兩隻雄性非洲迷你刺蝟，但寂寞的囝囝發情叫春叫不停，一峰就買多隻雌性刺蝟回家，讓牠們繁殖下一代，至今家中共有七隻刺蝟。撰文：李珮洳
因為一個獸醫朋友，兩年前林一峰開始養刺蝟，現時更養了七隻。由於第一、第二隻雄性刺蝟發情的緣故，林一峰便買了一隻雌性刺蝟回家讓牠們繁殖下一代，他說：「兩隻仔好寂寞咁喺度叫春，真係開始叫到有啲煩，當時我考慮得好清楚先至畀佢哋生，養吓養吓就有七隻。不過我要喺度同想養刺蝟嘅朋友講，每一隻刺蝟一定要有16至24吋嘅空間，仲要買個波畀佢哋跑，如果提供唔到呢個空間畀佢哋，我奉勸大家唔好養。」
甘為寶貝夾屎
訪問當日一峰帶了兩隻只有兩個月大、同樣是雌性的小刺蝟到場，白色的名Salt、原色的名Pepper，拍照時牠們都睡着了，一峰表示：「佢哋一日瞓20個鐘㗎，夜晚先係佢哋嘅活動時間，同埋之前佢哋已經影咗一轉相，所以畀閃光燈嚇到有少少驚。」原來一峰每天起床的第一件事，就是「夾屎」，他說：「佢哋每隻都有自己一個獨立膠盒，每朝早我都要用筷子夾屎，之後清理埋啲尿，確保佢哋間屋係乾淨同清爽，同埋氣溫要keep住25度，唔可以太熱。」
一般人都以為刺蝟有很強的攻擊性，一峰解釋多數時間都可以徒手捉住牠們，他說：「除非佢哋受驚啦，好似有一次走甩咗要捉番佢，嗰時就會拮手，要戴手套捉。」
愛犬追波亢奮
除了刺蝟，一峰家中最近多了一隻七歲大的雄性拉布拉多犬Oliver，是他與朋友共養的，一星期會有幾天在林家作客，他說：「Oliver有兩頭住家，佢另一個主人好錫佢、好負責任，而且仲有工人照顧佢，同埋Oliver自小得到好多好多人嘅愛，所以佢好信任人類，好鍾意黐住人。」
拍照時Oliver目不轉睛地望實一峰手上的網球，他表示網球是Oliver的最愛：「我懷疑佢係一個網球員，試過有次同佢散步，行過網球場，佢見到咁多網球好興奮，仲衝去人哋個網球籃度拎走一個波。」炎炎夏日，一峰會帶Oliver去游水，而且會確保家中不會太熱，他說：「養動物真係一世嘅事，大家真係要負責任呀，唔好一時衝動就帶佢哋返屋企。」
交配拮手見紅
雄性刺蝟發情時會不停兜圈及叫春，追着雌性刺蝟個多小時，之後交配。由於交配時雌性刺蝟的刺會變硬，所以雄性刺蝟的手會被刺到流血，不過等一會便會止血。
主人要負責任
林一峰指由於刺蝟的身形太細小，不可以接受絕育手術，他表示：「因為唔可以幫佢哋絕育，所以我長期將男仔同女仔分開，如果真係有朋友好想養，我要確保佢哋真係一個負責任嘅主人，先會畀刺蝟生BB。」
刺蝟糧食以幼貓糧為主，加上一個月為牠們冲一次凉，一峰說：「冲凉時就要用倉鼠用嘅洗頭水，再用牙刷擦，用清水過番乾淨，最重要係要用風筒吹番乾，一般刺蝟有七年壽命。」
