年頭曾經為自己訂立了幾個簡單任務，半年過去了，果然未有一樣做得成。想keep住日日跑，做唔到，理由係足踝發炎，哎吖，郁吓都痛，嗱，理由越繪形繪聲，內咎感就越細；又想自己少啲老氣橫秋，唔好乜都扮勁，結果又做唔到，理由……或者有啲嘢太容易根深柢固嘞，恨錯難返。
偏偏足球場，就專收老seafood。光榮歷史，隨時變成包袱；萬人簇擁，分分鐘叉錯腳。生活上人人想做上把，但開波前就真係會下把越着數，所以希臘呢隊波成功真係非運氣，係好多元素加埋先可以咁低調：人名，個個差唔多所以難以分辨；打法，積極防守消極主攻任對手發晒辦；形象，人唔型、衫唔靚、國家又瀕臨破產，根本無任何人會對如此一隊希臘有任何希冀，咁就好嘞，Nofansnohope，nohope就nopressure，如此一個爛佬設計，如此貼晒地的謙卑，成功有道理。
若果希臘面子在地底，英格蘭就在神州九號附近，尤其係竟然可以咁叻仔首名出線。入波係咪符碌冇人會記得，對手點冇運亦唔需要再提，更加唔好討論場波過程有幾悶場嘞，雖然英超講求的是過程，但國家隊就只着重賽果。
意大利迪羅斯就醒喎，埋牙前搶咗個下把位，「謝拉特一直係我偶像！」呢句說話確係好嘢，任何時候任何環境，只要是老seafood，一聽見咁俾人讚，都會非常自我陶醉，相信只有希臘人會對呢句說話免疫，甚至覺得你玩佢。
今屆EURO，冠軍將屬於謙卑的人，老seafood，唔該彈開，我話自己。
文：Keyman
now節目主持