英格蘭以殘陣打今屆歐國盃決賽周，反而交出好成績，仲喺D組力壓法國以首名入8強；而佢哋咁成功，全靠一支嘢，就係一支可以令班球員由唔靚仔，都變到靚仔嘅平價噴髮膠嘞！睇睇吓，朗尼真係靚仔咗喎。
朗尼卡路爾噴完入波
英格蘭前鋒朗尼雖則得嗰26歲，但就遇到男人最苦惱嘅髮線後移問題；而喺舊年夏天，佢就使咗3萬鎊（約37萬港元）去植髮，等自己唔使再做M字額。家陣佢頭髮多番，自信心都返晒嚟，仲鬼咁姿整，問隊友安祖卡路爾借咗支噴髮膠，幫自己個頭擸到靚一靚。呢位曼聯前鋒笑住咁承認：「我問安祖卡路爾借咗少少噴髮膠。但願我終有一日可以好似佢咁長頭髮啦！」
但我求大俠聽英國啲行家講，支噴髮膠其實唔係安祖卡路爾嘅，係佢嘅利物浦隊友佐敦軒達臣至真。有睇開英超嘅朋友都應該知道，軒仔出名貪靚；次次落場都gel到行一行，就算頂完頭槌，頭髮一啲都冇亂。聽講佢呢支噴髮膠係佢喺利物浦嘅超市買嘅，而且超平，只係2.65鎊（約32港元）咋。
物主軒仔慷慨借出
朗尼同埋安祖卡路爾用過軒仔支噴髮膠都有入波，而且都係用頭槌入嘅，睇嚟呢支神奇噴髮膠亦成為咗英格蘭喺護身符，搞到人人出場前都要噴兩嘢。據英格蘭嘅知情人士話：「英格蘭班球員用過支噴髮膠後，球隊喺今屆賽事都好順，所以佢哋相信支噴髮膠可以帶嚟幸運。猶記得喺1966年，卜比查爾頓唔用噴髮膠都可以幫英格蘭贏世界盃；但唔係佢唔想用，係佢冇得用啫（事關卜比查爾頓係地中海）。希望班球員用完噴髮膠後可以醒神啲，幫英軍再次喺大賽稱霸啦！」
話時話，啲人成日笑利物浦令英格蘭降呢；但係，如果唔係鶴臣選軒仔入隊，英軍就唔會有支神奇噴髮膠，安祖卡路爾同朗尼亦冇機會試用，或者都冇入球機會。所以話，紅軍啲球員唔係冇貢獻㗎！