鄉下人智慧，見到罕有的自然現象是福氣，要「嗱嗱聲」許個願，咁昨天唔少香港人應該把握黃昏時分，響那抹繞過海的彩虹底下許了個靚願望吧；然後響深夜時分，當烏克蘭嘅埋門中楣入咗而又判唔入嘅時候（編者按：該球沒有中楣），唔少球迷亦瞌埋雙眼誠心祈禱，定其實是冇眼睇兼爆了句粗呢？視乎你是當事人抑或是受害人了。
彩虹不常見，但咁大個人畢竟見過好幾次，所以當發現成條彩虹橋響窗外出現時，最興奮的係家中女兒，「嘩，我終於見到彩虹啦，係真嘅彩虹呀！」原來條彩虹的魔力還是相當厲害，肯定比幻彩詠香江，以及過年過節的煙花更有號召力；因為佢係book都book唔到嘅。不過彩虹乍現都有受害人喎，就係響facebook睇人家啲相先睇到彩虹嘅朋友嘞；明明唔使錢，明明就響出面，見唔到就係見唔到，好多朋友仔都似吃了酸葡萄一樣，但咁都好話唔抵嘅？
本來都唔知道原來烏克蘭有咁多fans，直到佢哋嗰球中楣不入。仲有，我終於明白第五旁證的作用，其實係用來為主球證孭鑊嘅；當前一日意大利教練柏蘭迪利還盛讚第五旁證係偉大發明（因為佢睇到卡斯辛奴入波）之際，第二日第五旁證又被證明係廢嘅。
「個波入咗成呎有多」
呢球波之頂癮，係似乎全世界只得嗰位第五旁證睇唔到入咗，烏克蘭教練布洛堅真正堅，佢話：「呢個波入咗成呎有多！」實牙實齒到呢。至於英格蘭球員們亦唔否認個波係入咗，之不過佢哋嘅答覆係：「運氣，兩年前我哋響世界盃冇運，又係咁彈楣當唔入，今日運氣終於到返我哋呢邊嘞！」着數唔到你手，就要公平；着數到咗你手，就要運氣。
睇唔到彩虹又好、中楣唔當你入又好，實在毋須嘆氣，下個幸運兒，好可能就係你。
Keyman
now節目主持