踩爛橙，C朗吐氣揚眉，其實有餘未盡！今晚8強鬥捷克，葡軍必想90鐘解決對手，避開對方門神施治係「延長戰」使出神救。捧葡國W，暫時係個人4場8強賽最有信心嘅重心注。
盡了力，成敗也無悔，對無謂謾罵批評，一笑置之好了。全世界睇死，但克羅地亞下半場加強進攻力度撲向世界「1哥」狂牛，賽後外界也讚，輸都冇人插；烏克蘭冇軍刀打正選，生牯仔勇撲英軍，波入了白界，仲有底線裁判員牛咁眼望實，都當唔入。判錯，喺白禮達為首嘅「尊貴」世界足球首腦們眼中，係球賽嘅正常一部份。
仲有7場，想起也精采，法國突失準「走線」先遇西班牙，初步盤口見狂牛單W仲熱過葡萄牙，幾過份！英軍今屆打平實整體戰，示人以弱，踢出彩虹；但一人球隊好似葡軍肯齊心都唔係問題。葡軍3場分組賽都有失波，但以C朗為首嘅中前場漸肯多進攻，抗壓能力不弱；對手就算有路斯基復出，但從鍊波蘭跳級到鬥葡兵，一眾新人前鋒不易再偷雞。
4年前分組賽，C朗有波入，葡兵3:1贏捷克；呢位大哥畢竟27歲了，季季入60球不易，國際賽生涯近頂峯；要留名，今次歐國盃對手一定易應付過兩年後世盃。佢係隊中大佬，見上仗肯分波畀前曼聯隊友拿尼，對方卻頻頻敗家，但只見冇嘴藐兼痛罵，因球隊士氣正盛也。
皇馬應屆聯賽殺低咗西班牙幫嘅巴塞封王；國家隊級，C朗今次目標當然係4強有機會鬥西班牙，再挫宿敵。捷克，佢未必放在眼內，會速戰速決。
蘋果波神
今日心水
熱：葡萄牙（上）
冷：葡萄牙勝2:1、3:1