現年45歲嘅林海峰（Jan）活躍電台、電視界，更不時做埋設計，被視為潮人。近日Jan設計咗一系列「30methingColorfulxglaceauvitaminwaterxLevi's」嘅產品，當中有個公仔，個頭配上彩虹，造型幾得意。由於產品係限量換購，所以Jan都喺自己facebook度公佈換領方法，等粉絲快啲換得心頭好。
多咗條褲
不過，有網友發現Jan設計嘅彩虹頭公仔，竟然有抄襲台灣7-11嘅公仔Open小將之嫌，啲網友仲將兩個公仔嘅相似之處列舉出嚟，佢哋話兩者嘅彩虹頭、眼、嘴同身形都好似，只係Jan嗰個公仔係有褲着，有網友揶揄Jan話：「唔好以為幫我着番條褲就係冇抄喎。」就連Jan嘅粉絲都喺佢facebook留言話個公仔似足Open小將，Jan即回覆話：「是否差太遠呢？不是呀！」
其實Jan已經唔係首次被指抄襲，08年初佢為自己棟篤笑設計海報，被指成個構圖、用色同符號特徵都同中國當代著名畫家岳敏君嘅風格一樣。