最近，自己用記事簿mark低每天的所作所為，然後評分；每日做例牌的事情如返工者，得分最低，偶爾做到一些自己高興別人又開心的事，得分就高啲，畀分標準很個人。好幾個星期之後，我發現自己對有朋友或家人參與的事，都打很高分，大概是因為你為人做、人為你做的事，總是雙倍窩心。
為了其他人而做一件事，動力可以很強。C朗在父親節那天出賽前，在底衫上寫自己個仔的名字，結果一場射門12次入2球，得到揭起球衣向全世界表達愛子之心的機會；當然我們不知道他在之前兩場有沒有穿上同一件底衫，總之在對荷蘭那天，他比平日更有力量，可能就是爸爸的動力，幫上一把吧。
巴洛迪利又有點不同，車身射入對愛爾蘭的世界波後，轉身就向不知何方大爆響口，講乜實在冇人知；因為老練的隊友一個箭步就埋嚟封了他的嘴，佢亦算係咁，冇進一步掙扎，但係從佢當時「牙鬆槓」的惡死模樣，你大概可以想像佢係想鬧人。
嗱，為咗證明自己，為咗向唔鍾意佢嘅人報復，咁樣都可以係落場搏老命的原因。之不過心術都有分正與邪，若果立心不良，固然有時可以係搶鏡；但更多時候可能係魔鬼上腦，做咗儍事，咁係咪次次都可以有隊友趕得切撲火呢？巴洛迪利咁將敵人放上心，如果有日能夠將心愛嘅人放響第一位，表現可能更上一層樓，就好似C朗咁，唔好再提美斯啦，掛住個愛子咪慈祥好多囉。
唔將自己放咁高，預留番多啲位置比其他人，心胸自然會闊啲，世界亦自然會靚好多。
文：keyman
now節目主持