貪曾仲有幾日就落台，正當全城狠批他的貪婪行為之時，平治香港竟然推出首次能夠享有環保汽車稅務優惠的S350LAMG特別版，身價過百萬的超級豪房都要貪七萬五，唔知有心定無意，呢批環保車仲送埋全套AMGPackage，實行俾買家貪到盡，啱晒貪曾胃口？試問有邊個買車會有着數都唔要吖。
撰文：梓濬
攝影：楊錦文
相同容積 引擎分兩類
大家可能奇怪平治S350L無啦啦點解會有環保稅優惠，原來新一批S350L分有兩個版本，分別係DES和DEH，新增的DES代表DirekteinspritzungStratified，即配置Directinjection直噴引擎。兩者容積雖然同樣是3.5公升V6引擎，但前者經過特別調校，使用直接噴注供油技術，令效能更佳，但就較適合更高品質的汽油使用，至於後者，則能迎合不同等級的汽油。
其實，簡單點說，DES是擁有更高規格的引擎設計，經過精密的改良，擁有低耗油和低廢排的優點，配在新S-Class上，在新標準下能符合香港環保署釐定的環保汽車資格，自不然得到稅項寬減。不過，正因為只能適用於優質汽油，代理會事先向顧客說明這批新車並不適用於國內的無鉛汽油，換言之，新車不能中港跨境使用，代理甚至會要求顧客簽字確保避免入國內汽油，否則引擎發生任何毛病就恕不負責，到時神仙都幫唔到你。
貪足十八萬幾
綜合油耗由原來100公里需要使用9公升汽油，減到只需7.7公升，好多人會以為部車慳油咗，引擎動力輸出一定會有所折扣？呢點小貪曾可以放心，新引擎馬力和扭力輸出同以前一樣，都係306匹及370Nm，駕駛感同加速感都無乜大分別。
至於這部S350LAMG特別版，只賣139萬多元，較已有稅項優惠的標準S350L還要便宜約8萬，仲有全副AMG大包圍車身配件，又有19吋原裝AMG合金輪圈，外形絕對唔輸蝕，睇得又打得，造型絕對比標準版更加型仔有睇頭。不過，有辣自然有唔辣，呢部特別版裏面，就無咗後座椅的按摩功能，亦無後座專用的冷氣出風系統；另外，亦只能夠提供前座小型天窗，巨型天幕玻璃車頂則欠奉。
至於車內其他裝備，好似真皮座位、桃木用料就同標準版毫無分別，所以，嚴格來說，這批特別版的S350L的確夠晒份量，省去的設備可以話微不足道。相反，全套AMG裝配就醒目時尚得多，保守估計呢套裝備連同合金輪圈最少要10萬元以上，連同車價的折減，一來一回就可以慳盡18萬幾，真係唔講得笑。
呢種唔覺唔覺就貪到十幾廿萬嘅方法，完全啱晒小貪曾嘅口味，不過小記最擔心嘅係小貪曾買完呢部車後，隨時又俾人窮追猛打，到時又要上台解畫兼加兩行谷極都谷唔出嘅眼淚，出來申寃架車人人皆可貪，咁就唔好啦。
平治S350LBlueEFFICIENCYAMG
引擎：3,498ccV6
馬力：306hp/6,500rpm
扭力：370Nm/3,500rpm
傳動系統：7G-Tronic自動波
售價：$139,8000
查詢：28957339（仁孚車行）
