蘋機會：PSV爆Seed　基拉超屈機

蘋機會：PSV爆Seed　基拉超屈機

手提版《特種高達》續作掛正動畫十周年牌頭推出，NBGI梗落重料，將《Seed》、《Destiny》聯同外傳多部作品，谷晒落隻Game，幾十部MS晒冷式登場！打機同動畫一樣，Freedom一出即刻橫掃全場，MultiLock、彩虹炮、流星號，基拉「爆Seed」仲屈機過屈原，打到三小強、面具佬全部變晒裹蒸「種」！

記者：陳國輝

右上角換槍反應快

■突擊自由有龍騎兵裝備，進可攻退可守，遇着佢極惡打。

唔係《Seed》迷嘅話，又唔代表毋須理會嘅！事關今集雖以《SeedDestiny》為故事背景，但出場機體認真多到爆，例如有自由突擊高達、曉、伊撒古專用嘅古夫烈燄型、伯勞裝備型嘅M1異端高達等等，就算係唔係《Seed》死忠粉絲，一樣心癢癢要玩番手！
新增機體固然有吸引力，但咪忘記今次平台係PSVita，你可以試吓用TouchScreen的操作快感！但老實講，遊戲跟輕觸屏連動性唔強，頂多只係加入右上角轉換武器、Refill彈藥等基本功能，不過對打開嘅Fans嚟講，可能純實體鍵更適合。有Gamer話齋，如果太依賴篤芒反而怕阻擋自己視線，減低應變速度喎。

■打到中期，有機會攞到基拉揸嘅突擊自由，輪到你魚肉對手。

■Strike識換槍劍炮三種裝備，一樣受歡迎。

■外傳出現嘅巨劍型藍異端，仲霸氣過揸絕世好劍嘅步驚雲。

■單Click右上角位置，就可立即更換武器。

■支援AdHoc模式，能夠同場2VS2四打。

■經PSV靚芒播放，動畫明顯比以前PSP版細緻好多。

日版畀多$90送貼

遊戲模式仍離不開由仔做起，你需要扮演CE士兵，並隨住地球聯合軍、大天使隊以及Z.A.F.T.三大勢力嘅發展，喺途中經歷動畫情節及經典場面，等你過足戲癮。而新作玩法上，也沿用VS系統，亦即採用再出擊作戰形態，透過扣減Cost值而限制出擊次數。
或許遊戲方式而言略欠新鮮感，不過值得注意係現時賣街嘅日版及行版貨之中，日版雖然貴$90，但係跟Game附送PSV機身貼紙，有齊三大主角機體，高達迷梗係必搶啦！

■隨住劇情發展，曉會遇上超巨型奸角！

■戰爭背景亦會由陸地打到上太空。

■高達Fans就係為呢張PSV機貼而揀日版，市價大概比行版貴$90。

《GundamSeedBattleDestiny》

機種：PSVita
類型：動作＋射擊
人數：1-4人
售價：$409
下載版：$328