蘋果蔡東豪版於六月十四日有倪以理訪問，一問一答，水平甚高，值得一讀，尤其是講到家族企業有過一二百年經驗，最懂得將家事、控股權與管理權三件事分開，控股家族接受外姓人做主席，行政總裁，更加值得香港及所有華人家族企業研究。
但倪以理提及「出色家族管理看怡和」嗰一段，左丁山不敢苟同。怡和在香港嘅地位與受尊重程度，自一九八五年遷冊百慕達以後，大幅度下滑，以前怡和係香港一哥，依家有幾多人還會認同怡和？香港置地算係怡和集團最亮麗一環，牛奶公司屬下之惠康、美心亦深入民心，但講真，肯利凱瑟克與西蒙凱瑟克兩兄弟在八十年代初為求自保，抗拒華資入侵，設立怡和策略互相控股聯防都算嘞，但呢兩兄弟管理眼光短視到極，「沽空香港」，將港燈賣俾李嘉誠，將香港電話賣俾大東電報局，將山頂及半山矜貴地段（如帝景園所在地）賣俾新鴻基地產，將銅鑼灣皇室行、灣仔夏慤大廈售賣畀華人置業，簡直係賤賣資產，為股東帶來日後之巨大收益損失，條數點計呀？呢兩兄弟實在係怡和集團股東之罪人。
或說係事後孔明，當年凱瑟克兄弟趕走外姓人紐碧堅，由西蒙凱瑟克掛帥，點能預測所出售之資產日後價值狂升呢！咁就不妨比較吓，另一個英資家族公司太古（史懷雅家族控制）就在怡和遷冊之時，決定在香港擴大投資，1987年人心虛怯之時，買下金鐘兵房地段，打造成太古廣場，以後又陸續在鰂魚涌擴建太古坊，直情賺到笑完又笑，威風過怡和不知幾多倍。
家族企業除了要保衞企業控制權之外，如果上咗市，還要為股東尋求最大利益，訂下長遠發展策略。怡和凱瑟克家族在呢方面就目光短淺咯，管理點算出色呀？過去二十五年最出色之家族企業，有排數都未數到怡和。今年四月，怡和任命西蒙凱瑟克之子Benjamin為常務董事，呢位新一代竟然打破四分一世紀以來之沉寂，今年重返馬場，成為準馬主㖭，唔通有意再在香港一展拳腳？須知道直至紐碧堅離開為止，每一位怡和大班都係馬會當然董事呀！