荷蘭足球其實沒有變，只是球迷們都太善忘吧。他們有球星、卻沒有團隊；他們有頭威，卻欠後勁；他們很搶鏡，卻很多負面新聞……荷蘭越來越似英格蘭，偏偏英格蘭就慢慢變成了挪威或瑞典。
死亡B組，應出局的出了局，可是不應出局的也出了局。丹麥由頭到尾都在拚命，表現令人嘆為觀止，態度一流！但當下次丹麥、荷蘭有緣響球場上再碰到時，大家仍然會照捧荷蘭！
若果賽前有算命佬同愛爾蘭講，你哋今屆成績唔會差過荷蘭，我諗愛爾蘭fans真的不可置信。當C朗入多荷蘭一球，判橙軍死刑時，我不斷在腦中搜索，究竟兩年前在南非的世界盃，荷蘭係憑乜入到決賽呢？
說實在，荷蘭還是有很多優點，橙衣是永恒的獨特標記；其二是荷蘭名宿總是能夠講出令人回味的金句。2000年，荷蘭以熱門姿態對哀兵意大利的4強戰，開波前告魯夫預測：「意大利贏唔到荷蘭、但荷蘭可以輸畀意大利！」看似瘋語，卻在比賽中應驗了，荷蘭有大量埋門但不入，終於在加時後互射12碼時，幾個射晒出界，送意大利入決賽。
然後昨天分組賽前，前國腳門將尹布基倫表示：「若果荷蘭能夠響最後一輪贏波出到線，咁佢哋連冠軍都會捧埋！」表面看似是幫球隊打氣，查實有骨，即是話你係咁叻的話，我畀個皇帝你做都得啦。這就是聰明懶人的悲哀，明明係要日日溫啲先pass嘅，就妄想最後一晚通宵刨得晒，結果仲要瞓着咗。
睇嚟荷蘭要畀啲時間班fans，一兩年就夠，到時球迷就又乜都唔記得嘞。
文：Keyman
now節目主持