荷蘭3連敗拜拜，心裏也戚戚然，但貼波無情，睇到隊波一再唔掂，不能硬要瞓身叫人支持；今天到英、法出場，一隊係今屆自己睇好可封王，一隊今屆未有太高期望但永遠有情意結。英軍用兩個陣踢咗兩場好波，但未到轉軚時候，其實和波夠出線；串射法國，博佢哋首名。
荷蘭先入葡軍一球，初段係威係勢，擁躉仲以為有希望；但之後踢到不知所謂，唔係個龍門左飛右撲，準會大敗一場，個「腦」（教練尹馬維克）有問題，其他「手腳」（一眾大牌兵）根本唔協調拒絕賣命。希望佢哋喺兩年後巴西世界盃能重振雄風。賽後，我見到尹帥助手高古，懶理波士，獨自呆坐後備席，荷兵興卸膊，從那個鏡頭，大家可以感受得到。
個「腦」緊要，英軍半力暫時踢出彩虹，鶴臣居功至偉，士氣保持高昂，對能走更遠好有幫助；不過從來對英軍踢國際賽，都唔應該喺金錢上作出太多支持。今晚朗尼復出鬥主辦國烏克蘭，正面睇威力更強；但負面係3場波玩3個陣，加上禾仔有傷，折翼下且看守得穩之餘，支援朗尼會否打折扣。法兵勢盛，同德國一樣唔會係呢個時候對包尾嘅瑞典留情；英軍要先頂住烏克蘭搶3分嘅壓力，和波機會唔細。
唔係個個似小弟其中一位戰友，愛德國、捧車仔同拜仁，今個歐洲球季心靈、口袋也大滿足。有啲人可以左擁右抱，不用羡慕，也羡慕不來；荷蘭早現頹勢心理有晒準備，今屆小弟純為名利而戰！
文：蘋果波神