雲想衣裳：蒙嘉慧　包結唔包生

眨吓眼，已踏入人生另一階段─中女的蒙嘉慧（YoYo），與伊健拍拖六年、同居三年，口講唔愛迫婚，同居生活更好，但女人的口是心非，伊健不會不知。婚可結，惟獨一定唔要下一代。「我試過發過一個夢就係為揀科揀學校而煩惱，感覺好似噩夢咁，希望唔好有意外啦。」唔生都好，起碼唔使怕末日，但說漏了，意外亦可以是人為的，女人的口是心非，伊健你會明嗎？

記者：雷福財
攝影：伍慶泉
服裝提供：AFEleganceCouture

自認有問必答

■18K白金紅寶石頸鏈約$90,000起、18K白金紅寶石戒指約$29,000起、18K白金紅寶石耳環約$11,000起、18K白金紅寶石手鏈約$36,000起

藝人拍拖九成收埋，即使是公認，口講還是「好朋友」，若認同居更會怕得失各自的Fans。但YoYo自問是有問必答，「早前上阿Lo（林曉峰）個商台節目講關於同居，如果我又要就住就住講，倒不如唔好上。就算喺街上有人見到問我都會認，但就唔會主動講。」同居是為結婚？「始終爹哋媽咪離過婚，想藉同居睇清楚大家夾唔夾。如果要一世，早啲清楚大家底牌仲好，唔想後悔。我覺得兩個人嘅關係係講相處同包容對方缺點，學識點接受另一個人嘅生活習慣。我絕對相信，結咗都可以離，婚姻係以相處維繫而非一張紙。」YoYo更坦承自己唔愛日日化妝、唔愛着裙，伊健接受到，唔結都夠甜。

■18K白金五卡鑽石后冠約$81,000起、18K白金鑽石頸鏈約$111,000起、18K白金鑽石耳環約$25,000起

夢見自己有B

外表予人硬朗感的YoYo，每提到伊健總是讚不絕口，猶如開籠雀。「人越大越發覺難搵一個合拍嘅伴侶，SoFar我睇到佢生活每個細節都接受到，係未收到花啫，哈。但就會久不久幫我Download一啲啱我玩嘅Game，啲人話『甲之熊掌乙之砒霜』，伊健對我來說就係熊掌。」那婚後會生小孩嗎？「哈，玩人哋嗰個就好，自己生就唔好。試過發過一個夢就係為揀科揀學校而煩惱，好大壓力，怕揀錯，感覺好似噩夢咁，始終我認為小朋友係應該有童年，得閒去吓玩咪幾好，我最開心嘅童年回憶就係同舅父去挖蜆，但時下媽咪會成日諗補習同考試，所以最好唔要，希望唔好有意外啦。」

■南洋珍珠頸鏈約$432,000起、南洋珍珠戒指約$110,000起、南洋珍珠耳環約$100,000起

■18K白金鑽石對戒女裝約$3,700起、男裝約$4,500起

■18K白金鑽石對戒女裝約$3,700起、男裝約$4,700起

■白金對戒女裝約$2,500起、男裝約$3,300起

做一日皇后

穿起婚紗，戴起鑽飾，可能已在憧憬「那天」的來臨。對於頭上的周大福鑽冠，YoYo自覺做了一日皇后。「平日做開女僕呀嘛，自己又鍾意執屋。不過老實講，我咁大個女未見過五卡鑽石，如果擁有一套已經好開心，感覺似藝術品多於首飾。尤其最愛係頸鏈，可以將女性由頸到膊頭嘅線條勾劃得更有美感。最好日後有多啲Sponsor，咁就可以成日換款。」計我話，女人最期待晒老公送嗰隻至真。