食衞局局長周一嶽先前打晒開口牌，話到明自己願意為公眾服務，在甚麼崗位都唔會介意，即係話候任特首叫佢做乜局長都冇所謂。點知梁先生容他不下，老早內定高永文做食衞局長之餘，又唔肯調派周醫生去任何一個局，於是周局長唯有忍着眼淚說goodbye囉，既然再無包袱咯，於是與傳媒茶敍之時，竟敢從醫生角度，推斷李旺陽身有嚴重殘疾，無可能自己在窗前吊頸自殺。其他新貴官員人人收口，周局長卻大膽篤穿，顯見得人在江湖，往往身不由己，到無所求之時，先可以講自己相信嘅說話。
林瑞麟就好俾面梁先生，六月十一日黃昏開酒會與傳媒及議員拜拜，對公事不發一言，只係話去牛津讀神學，十分愉快，不愧為醒目仔，絕對係做官之好材料。左丁山為了赴周融之約，在會場逗留十數分鐘就與林司長話別，匆匆由添馬艦政府總部行去金鐘搭的士，幸好不太塞車，到達山光道馬會還不算太遲。
周融為乜嘢要在馬會請吃飯，仲出埋女兒、新婚太太助陣㖭？周融話：「自己到ATV開咪，咪自己請食飯囉！」究竟開咪講乜，電視台在晚上多數播肥皂劇，好少有脫口騷嘅噃，但如果照抄霍士電視嘅話，在黃金時間以O'RileyFactor作主打！應有噱頭，但周融係唔係奧拉利呀？羅拔周話未有咁大想頭，其實佢鍾意做DavidLetterman，講吓輕鬆笑話，以前佢開過棟篤笑㗎。
羅拔之新節目與靚女繆美詩拍檔，取名為「周融．繆美詩新聞．個人Show」，於6月25日起逢星期一至五晚上8時播出。我地話呢個名認真長氣，不如簡單啲叫「融詩新聞個人騷」啦，但讀出嚟即刻覺得不妥，融詩唔係幾好聽，立即改為「美融新聞個人騷」，講唔定會吸收好多美容廣告㖭！亞視晚上節目無甚收視率，拚死無大害，嘗試新節目不見得有任何損失。活力先生拍心口話周融繆美詩個人Show一定可以將收視率提升以倍數計，真係咁巴閉？乜唔係啫，原來亞視晚上嘅收視率只得一至兩點，羅拔周將收視拉高至三至四點，算有功勞㗎嘞！