傑志助教兼nowTV評述員鄭兆聰，早前喺足總盃決賽因疑似「胸」飛馬職球員，被罰紅牌，足總紀律小組噚日就罰佢停賽6場。雖然聰仔認為判罰過重，但佢決定唔上訴，兼已親自發短訊向當事人道歉；仲話今次算係一個教訓喎。希望事件唔好影響佢評述歐國盃嘅心情啦！
罰停賽6場向「牛丸」道歉
上月26日喺大球場舉行嘅足總盃決賽，傑志同天水圍飛馬喺法定120分鐘踢成3:3，最終有港版巴塞之稱嘅傑志，憑互射12碼氣走飛馬，榮膺今季3冠王。不過，雙方職球員喺賽事中途發生爭執，鄭兆聰疑似用心口撞開飛馬總教練陳曉明同行政主任陳婉婷，結果換嚟一面紅牌。足總紀律小組認為聰仔當日行為有挑釁性，亦有違體育精神，所以噚日判咗佢停賽6場。
我求大俠噚日搵過聰仔，佢話踢波連教波成廿幾年，都未試過行差踏錯，今次一劑就罰咁重，自己都覺得意外；不過佢都話會接受，唔打算上訴，搞成咁算係買個教訓啦。佢仲叫我求大俠呼籲年輕人，唔好因為一時衝動而做出鹵莽行為。聰仔又話已經透過短訊，同牛丸（陳婉婷）道歉，對方亦接納咗。
網友早前狂插人氣跌
聰仔「胸」人事件後，除咗被網友狂插佢打女人之外，連nowTV部份評述員，講波時睇到球員心口控波，都語帶雙關咁揶揄要學Ricky咁「心口鑲鋼板」。唔知係咪受到事件影響，聰仔人氣亦受損，nowTV早前賣廣告宣傳歐國盃，揀3位星級評述員做大相，聰仔就影都冇；反而揀咗大哥瑜（蔡育瑜）同兩位客席講波佬何輝同丁偉傑做主打，我求大俠就唔知係乜原因喇。
西班牙今屆歐國盃打得唔好，但噚日都可以擊敗克羅地亞晉級8強，呢場波聰仔都有份評述；我求大俠希望呢位同狂牛兵團血脈相連嘅西甲專家，經過今次失意事件後，雨過天青，同西班牙一齊喺歐國盃盡快蒲番上水面，長玩到最後。
