信唔少車迷睇完《車手》預告片，都會畀片中一句對白「八千轉兩米車」搞到心癢難耐，期待戲中車手表演八千轉過彎場面的同時，又有無想過此話背後的意義？唔好飛車亦唔熟飛車的鄭保瑞導演，樂於嘗試以隱形戰車為題材，道出人生追追逐逐的哲理，「車幾快都無用，要知自己的方向先可以DriveYourLife！」
記者：許維雅
攝影：楊錦文
《車手》劇照
「男人望車等同望女人……」齋睇唔搞？
相約《車手》導演鄭保瑞做專訪，滿以為他是車癡一名，怎知他直認膽小怕死，一世人只坐過三次過山車都會合上眼，「曾經心郁郁想開快車，但試兩腳後都係驚。」惟有以為他愛睇飛車戲，怎知他又自言興趣不大。何解搭上一個題材既神秘又刺激的隱形戰車電影？「原故事係來自一個美國編劇，杜琪峯收到後表明無興趣拍，就將劇本交到我手上。主題起初只係警車與賊車惡鬥的故事，我要將故事搬到來香港，第一時間就諗起交通部，之後資料搜集睇吓邊個部門有趣，先知有隱形戰車。」決定題材後，令他聯想起的飛車場面竟然係《TheFrenchConnection》及《ToLiveandDieinL.A.》，「即係70至80年代的美國警匪片，相比近年大熱的《FastandFurious》系列，最大分別就係當年真係有人揸架車，但《F&F》裏面大部份都係特技。」
想拍真實飛車卻又所知唔多，咩甩尾、Burn胎都唔識，所以好早已經搵動作指導錢嘉樂幫手度劇本。訪問當日連試車都非常斯文，實在好難理解他如何投入拍飛車戲，「雖然我唔鍾意揸快車，但其實我同其他男人一樣喜歡欣賞車，感覺就好似欣賞女人一樣，我眼中有好多車都好Sexy。」他更笑言打開頭冚就好似女人除衫，引擎就係汽車的內衣，性感與否一目了然。若繼續以女人套用，愛睇偈多過改偈，呢啲係咪叫齋睇唔搞呢？
「做人同揸車都唔可以無團火……」燒得其所？
鄭保瑞覺得拍電影唔可能只拍自己認識的題材，問題只在於你肯唔肯跳入去那個世界。不過他真正想探討的其實是，「隱形戰車車手究竟係點？好想了解呢班車手的心態，經常揸住架車追人，為玩？為工作？又或者你以為追住人好威咩？啄人車尾好勁？Sorry，其實你係跟緊人尾。」正如戲中好勝的樂仔追賊追到入後巷，其實係班賊匪專登畀條死路佢行。「佢哋成日話我唔會畀你甩到尾燈，點解你要望住人尾燈呢？點解唔行自己條路呢？」萬法歸宗，凡事皆通，深信揸車亦可悟出人生道理，原來對白「八千轉兩米車」亦有哲理，「架車推到八千轉已經幾乎谷爆，拍攝現場聽到啲刺耳聲高頻到嚇死人，好似野獸咁尖叫，但點控制到一隻發狂野獸只可以行兩米，道理就係車手先要操控自己，你㩒得住自己先㩒得住架車。當時情況就係要咁高轉先可以令架車離地過死角位，人生亦如是，做人唔可以無團火，點運用團火解困而又唔好畀啲火掩蓋咗自己方為上策。」
經手電影都畀人感覺愛講耶穌，鄭卻認為：「拍戲未必一定要講道理，但總要找一個理由，有意義先有動力！人生就是DriveYourLife，無目的地，畀架車你有幾快都無用，要知自己想去邊，拍戲就係我人生。」《車手》正正將他人生的那團火燒畀大家睇，「其實套戲年幾前已經幾乎拍好，我睇完第一cut後，幾乎想打爆個電視機！人生總有做錯決定的時候，錯的意義在於你會否找回正軌，幸好我遇着一個同我一樣愛堅持的監製杜Sir。當時我喺外地拍緊戲，好欣賞佢一句：『等導演返嚟！』最後等了我八個月補拍先出到街。」相信那份對電影的堅持就是鄭的八千轉人生了。
隱形大熱 好劈5系
好多車迷都知香港近年有大部份隱形戰車都是選用寶馬5系旅行車，拍攝時借唔到惟有改由520iASaloonExecutive頂上。鄭只識用舒服來形容寶馬5系，「架車太定喇！揸快咗都唔知。何況我揸車唔叻，我都handle到嘅就覺得一定係架車勁！」備有Sporty+模式、8速波箱、豪華寬闊內櫳的5系向來出名劈得，近年仲取得環保稅優惠，大大提升了吸引力。
BMW520iASaloonExecutive
引擎：1,997cc直4TwinPowerTurbo
馬力：184hp/5,000rpm
扭力：270Nm/1,250-4,500rpm
傳動：8速Steptronic自動波連+/-
售價：$465,000（已扣除環保稅優惠）
查詢：31299000（BMWHK）
