老人家成日講「人搖褔薄、樹搖葉落」，做人最緊要穩打穩紮夠淡定。估唔到CD機亦有同樣方針，做CD轉盤做到響晒朵嘅Esoteric，憑轉得穩、讀得準嘅轉盤，早已贏盡業界口碑。旗下最新K-05同K-07當然繼承呢個最強賣點，價錢更比旗艦型號平一半有多！
記者：韓繼聰
攝影：潘志恆
Model：Tina@InterplayWorkshop
平一半都有最強轉盤
稱K-05做平價旗艦，當然有原因，事關售價不到頂級K-01嘅$138,000一半，但就大量引用佢多方面高級設計。當中最重要就係搭載咗品牌代表性的VRDS-NEOVMK-5轉盤，淨係VRDS（無振動剛性壓片系統）已經值回票價。此轉盤採用了鋁及聚碳酸酯作材料，進行高精度的混合結構，以盡量減少不良轉動的問題，為高速旋轉的CD提供最穩定的基礎，讓資料讀取更精確無誤，也就是發燒友拚命追求的最少失真。另外，其32bitAudio4Pro解碼晶片亦能提供高質素的解碼。「呢部機失真極低，所以在播放現場錄音、爵士樂同古典音樂時，都可呈現出最真實的聲音。」Calvin細味着玉置浩二的演唱會LiveCD時說。
新一代抵玩CD盤
新機中另一位成員K-07，雖沒配置皇牌VRDS轉盤，但唔代表佢無料到。採用新一代研發VOSP（垂直排列光學穩定平台）轉盤系統，主要係減少了VRDS部份組件，但力求保留其精髓。另外將8mm合金壓片加重，增加CD轉動的穩定性，有效減少震動和諧振，令拾訊更精準，可算不失家族穩定風範。而更抵玩嘅，係K-07解碼部份沿用同K-05相同的32bitAudio4Pro解碼晶片，亦一樣支援光纖、同軸和USB輸入。如果唔係EsotericVRDS嘅HardCoreFans，以K-07平K-05成萬蚊嘅價錢，實在係相當抵玩。
轉盤之王小史
Esoteric其實係日牌TEAC的Hi-End支線品牌，於1987年首次發表。其首個產品P-1/D-1分體式CD機就已採用獨有的VRDS轉盤，令發燒友驚覺轉盤穩定嘅重要性。品牌主力研究從轉盤設計改善資料讀取的準確度，因而得到唔少音響廠商認同，好似EMMLABS、Wadia、AudioAero同dCS等，均將VRDS轉盤引入自家產品之中，可算係CD轉盤之王。
查詢：大昌影音（28046863）