古巨基與商台近年關係惡劣，尤其過去多年基仔在《叱咤樂壇頒獎禮》屢次敗在陳奕迅（Eason）之下，令基仔與商台關係雪上加霜。不過隨住基仔好友陳志雲重返商台任CEO，基仔亦得以在商台翻生。昨日志雲為商台新節目主持啟動禮，基仔罕有地偕一眾迷雲黨力撐，明年《叱咤》頒獎禮，基仔大有機會撼低Eason，重奪男歌手金獎，一吐多年寃屈氣。
曾掀起電視風雲的無綫前總經理陳志雲，今年3月重返商台後再掀電台風雲，其一眾迷雲黨更在商台搶灘，之前跟商台交惡的古巨基，在《叱咤》頒獎禮連番敗給陳奕迅，失去男歌手金獎，在志雲重返商台任CEO後，基仔跟商台關係亦忽然變得友好。繼上月商台舉行的《903二次創作音樂會》後，基仔昨日更畀面出席志雲為商台主持的《你和我和時代挑戰》特備直播節目暨啟動禮，雙方關係破冰，絕對有助基仔明年重登叱咤男歌手金獎寶座。
志雲風騷介紹王喜
記者昨日致電志雲，問到基仔在商台翻生，及基仔有機會撼低Eason攞叱咤男歌金獎時，志雲笑說：「大家想多咗啦，基仔一直好支持每一個電台。《叱咤》舉辦咗咁多年，有佢一定制度、透明度同認可性喺度。」然而基仔在志雲重返商台後，才現身商台活動，對此志雲說：「事有湊巧啫。」
昨日啟動禮上，迷雲黨成員古巨基、王喜、黎耀祥、鄧健泓，以及多年沒出席商台活動的梁詠琪、許志安、吳雨霏、田北俊和周梁淑怡等齊到場力撐。活動上志雲相當風騷，不停將與他風雨同路的好友王喜介紹給現場嘉賓認識。有指志雲掌管商台後進行大清掃，志雲說：「一個機構有人加入、有人離開係正常，今次係正常節目更新。」
基仔盼客串做主持
英皇唱片昨只得古巨基撐場，問他會否開咪主持節目？他說：「未夠班，若果係客串主持都可以。」王喜表示未收到邀請加盟商台，記者建議他自薦，他即說：「好呀，我要入商台，我係商台出身，返嚟做都係開心事。」
昨日一眾迷雲黨齊齊現身商台力撐志雲，獨志雲愛將崔建邦未有現身。據悉志雲有邀請愛將崔建邦出席，但他未有現身，令志雲大感失望，對此商台公關回應說：「我哋係有邀請崔建邦，佢可能有事嚟唔到，咁都冇辦法。」
冇黨派林曉峰離職
林曉峰與車婉婉主持多年的《巴巴閉afternoonD》將被叮走，由蘇施黃與Bonnie主持的《大玩派》取代，志雲解釋說：「冇法，希望體諒，相信佢明白，佢冇不快，我有了解過，噚晚仲傾過電話。」林曉峰昨日在尖沙嘴出席活動時，承認將離職商台，但聲稱不會失望，亦不評論是否因不是迷雲黨而受冷待，他說：「我一向冇黨冇派做自己事，工作用心去做唔理太多事。」
林以諾牧師早前的同性戀言論引起很大迴響，志雲指林牧師有一定壓力，但他不會再去評論事件，他說：「相信每人都有自由、自己生活、自己性取向、自己信仰。」王喜也說：「佢有佢自由去表達。」
其實基仔當年由商台一手捧起，97年更擊敗三大天王奪男歌手銀獎，之後他奪得04年度男歌手金獎，但自05年度開始，男歌手金獎年年敗給Eason，有傳因為環球高層黃劍濤是商台高層甘菁菁丈夫，令Eason獲商台特別照顧。在05年度至上年度的男歌手金獎，除08年度，也是Eason天下，基仔亦因此與商台交惡。而今年初舉行的上年度《叱咤》，基仔更被踢出男歌手三甲，可見雙方關係極度惡劣。不過基仔好友志雲現重返商台成為甘菁菁上司，Eason雄霸商台歷史亦勢將改寫。採訪、攝影：馬建華、
魯萍、仇志德