星期日父親節，各位乖仔乖女有冇陪完老竇飲早茶、食晚飯，然後消夜直落睇埋歐國盃呢？職業球員就梗係冇咁得閒，葡萄牙對荷蘭嘅B組出線生死大戰，適逢喺父親節當晚舉行；葡國27歲嘅翼鋒基斯坦奴朗拿度（C朗）就威到盡，個人梅開二度，助國家隊2:1反勝荷蘭，取得B組次名出線資格。C朗賽後就做好爸爸同好囝囝，向兩歲小C朗示愛之餘，亦不忘懷念亡父。
父親節醒神入兩粒
C朗上仗對丹麥射失咗兩個單刀，搞到球隊爭啲俾丹麥逼和；佢賽後就好似細路仔想喊咁滯。呢場對荷蘭，C朗就唔同晒款，28分鐘接應荷奧彭利拿妙傳，單刀建功，抵銷咗荷蘭中場雲達華治遠射先開紀錄；74分鐘，佢仲靠一次反擊，接應拿尼傳中，近門射入，反超前2:1。全取3分之後，葡萄牙亦取得次名出線權，8強將對A組首名捷克。
C朗賽後梗係風騷啦，除埋件波衫．露出寫上「Junior,PaiteamaParabens」葡文字嘅底衫，中文就解作「小孩，爸爸愛你！祝你生日快樂。」原來咁啱6月17日就係佢囝囝CristianoRonaldoJunior生日，就算老竇要喺球場搏殺，都唔會忘記乖仔生日。做完好爸爸，C朗喺記者會就做埋孝子，講到同日嘅父親節，佢就話：「我相信父親會喺天堂睇緊我比賽。」
神射手急跌至5.4倍
雖然已為人父，不過C朗貪靚嘅性格點都冇改。上半場佢就gel個小雞冠頭，半場休息就搞個「allback」蛋撻頭；到出席記者會又gel番起頭髮，整個勁雞冠頭，認真多變化。講起變化，C朗個神射手賠率變化都好大。賽前，神射手賠率佢已經冷到70倍，不過梅開二度後，加上有3球喺手嘅馬里奧高美斯同日交白卷，令C朗只落後一球，立即被莊家改盤，急跌至5.4倍成為第4熱門。而且，C朗今屆歐國盃又有波入後，自04歐國盃後，已經連續5屆大賽幫葡萄牙入波，睇嚟8強對捷克，都係靠晒佢。
C朗變髮逐格睇
