無綫新劇《情越海岸線》一班演員噚日喺屯門咖啡灣泳灘拍沙灘排球戲，朝早落大雨，搞到班演員濕晒，到中午停雨先可以再拍。陳茵媺同李詩韻噚日分別露腰同騷長腿，佢哋喺唔同年份選美，但年紀一樣，以前喺多倫多讀書時都分別打過校隊，拍攝時佢哋好博，雖然冇撲波食沙，但都撞到雙膝通紅。
樂瞳食波餅
拍攝時，導演笑樂瞳拍咗一個朝早開咗200球都開唔到波，事實見樂瞳真係執波多過打波，佢仲口多多寸黃浩然同陳展鵬打波都要戴黑超，但話口未完就食波餅，樂瞳摸住塊面話：「個鼻未甩。」之後浩然爆料話：「為咗要拍遷就樂瞳高度嘅鏡頭，劇組為佢book咗張彈床畀佢跳起扣殺，佢喺沙灘都企唔穩。」最搞笑係記者要求樂瞳去彈床附近影相，佢仲儍更更唔知發生乜事，浩然就話：「廿幾三十歲人咁天真，抵啲高登仔咁鍾意你。」
展鵬同浩然戴住黑超個look似足女，可惜沙灘冇乜人，唔知啲女藝員有冇令佢地大飽眼福，浩然話：「拍嗰時我哋喺後面，撲波食沙有我份，嘢冇我份。」展鵬接住話：「我哋打排球戴超真正用意係防曬啫。」