現年只係31歲嘅謝霆鋒雖然情路波折，但佢就投資有道，喺03年用咗七位數字，喺香港搞咗間影像後期製作公司，叫PostProductionOffice，呢間公司搞得有聲有色，仲年賺過億。
霆鋒嘅製作王國最近不斷擴展，佢喺上海開咗分公司之後，最近再豪擲八位數字，喺北京再開分公司，香港總公司同上海嘅分公司，會專門搞廣告後期製作，北京分公司就主要做電影後期製作，北京嘅寫字樓面積足足一萬呎，仲整咗間有30幾個座位嘅3D私人戲院，銀幕有30呎咁闊，正過香港唔少迷你戲院。
栢芝缺席開幕禮
霆鋒嘅北京分公司喺上星期五開張，霆鋒請咗一班中港電影人出席開幕禮，香港導演黃真真、黃岳泰同鄭希怡（Yumiko）等都有出席，霆鋒父母謝賢、狄波拉同細妹謝婷婷當然有拉隊捧場，霆鋒經理人霍汶希都有到賀。Yumiko仲同霆鋒拍咗一段3D影片喺儀式上播放，不過，張栢芝同埋一對寶貝仔就冇出現，亦冇送花籃賀霆鋒。
撰文：葉雪