歷史重演，希臘做到，今晚C組3隊又如何？俄羅斯企喺榜首都可以輸得咁肉酸，大家都係小心為上。簡單啲，重心推介意大利入球「大」；另一場小注博克軍贏狂牛，怕乜。
勁開西班牙炒愛爾蘭，再加英法兩上盤後，熱門客食到應，戒心少了。波蘭，小弟也看錯，部份球員質素所限，激情有餘，力撐全場實力不足；但俄羅斯成隊波無論部署或者場上發揮突然大失準，最差仍然係本欄不斷提及嘅艾沙維，做隊長冇腳好波，俾希臘守死靠一個突擊收死，波都入唔到，活該！
要博冷，有時可試吓查找熱門隊嘅不足，意大利要必勝，莊家開到一球/球半七幾水，畀你中到又點話，根本冇乜水位走，捧波膽尚可。對手愛爾蘭已出局，但熟英國波都知，佢哋一定唔會似俄羅斯輸得咁騎呢，更何況今次對家係屢傳假波嘅意大利。唔係要捧愛爾蘭贏，係博佢哋打場尊嚴之戰，亦唔會死守求和，鬥攻博入到一兩球。另一場，全球關注會否開2:2，克羅地亞今場防線會受到大考驗，希望佢哋肯喺中場加壓，咪俾被手搓死；然後由兩大箭頭考驗一吓唔會太穩陣嘅狂牛後防，6.5倍W，生死相鬥，唔怕一試喎。
要避開公眾熱門，仲有一樣叫做「人做我唔做，殺出新血路」；上周末成個擂台都灑滿俄羅斯嘅鮮血，但同事何西兄一注獨中希臘冷W，賭波包拗頸，有時都係一種方法，始終贏嘅人佔極少數。
蘋果波神
今日心水
熱：意大利大
冷：克羅地亞勝