我哋nowSports攝製隊出發前收到風，在基輔進行的首場D組分組賽烏克蘭對瑞典，賽前一天球場官方售票處仍有飛賣，友人更用正價70歐元（約686港元）成功購票入場。
但在頓涅茨克的頓巴斯球場，3場分組賽皆有勁旅法國或英格蘭壓陣，到埗時門票早已售罄。場外明目張膽兜售黃牛的亦不多，但無票球迷想感受大戰氣氛，仍可選擇到官方主理的卓巴高華球迷區(SherbakovPark)齊齊嗌餐飽。
保安嚴密安檢需時
這裏距頓巴斯球場約5分鐘車程，可容納3.5萬球迷在大電視下睇波，而且入場費全免，吸引大批本地以及來自俄羅斯的球迷，每逢烏克蘭出戰的比賽日更擠得水洩不通。
但這裏保安卻非常嚴密，球迷入場前均要查袋、搜身，嚴禁入場物品的標示掛滿整個大門，雨傘頭盔水樽通通禁，旗幟的旗竿最粗亦只可有一厘米。無他，日前波蘭發生過球迷衝突，保安森嚴可以理解。採訪隊一行10人，便花了逾20分鐘安檢才能進場！
場內劃分了數個區域，每區均有官方贊助商提供的超級大電視，官方紀念品店、餐廳當然唔少得。還有大型舞台，開賽前有Liveband表演或DJ打碟助興。
烏克蘭人都鍾意唱K
還有遊戲攤位，射龍門、國旗彩繪等應有盡有，難怪中午12時開始便有球迷到場打躉。在此更發現烏克蘭人同香港有個共通點：就是鍾意唱K！這裏的卡拉OK攤位大排長龍，不少女球迷掛住唱歌連波都唔睇！
nowSports評述員方栢翹烏克蘭直擊