今日父親節，輪到孝敬一家之主的爸爸，型爸馬德鐘、唱爸張崇德和盛女陳霽平三個星級家庭各有慶祝活動。崇德和太太劉美娟一家四口食雪糕甜蜜蜜，兩父子寃氣咀唔停，崇德自認「黐身爹哋」，為不錯過子女成長每個開心片段，願犧牲自由時間緊貼子女，夫婦倆齊用愛灌溉一對孩子，讓他們開心成才。撰文：比華利
張崇德和劉美娟結婚11年，育有5歲長子日希和3歲幼女日晴，四口之家每天都充滿歡笑聲。精力旺盛的崇德無時無刻為子女炮製笑彈，還教育子女用開心態度面對人生每個逆境。父親節當前，子女年紀小，沒財力為爸爸慶祝，日希和日晴用盡心思繪畫的父親節卡，再加上兩人天真爛漫的笑容，正正是崇德最窩心的禮物。
不打罵子女
崇德和太太劉美娟的教仔心得，不但從不打罵，更不用負面字眼斥責子女，他說：「囝囝囡囡係唔知乜嘢叫曳曳，我哋唔用呢套傳統激將教法，佢哋做錯咗，我哋會直接講出佢哋錯嘅地方，用道理去鼓勵佢哋。我會令佢哋每日都開開心心，用快樂去解決問題。」劉美娟也不介意升呢做口水多過茶媽咪，她搞笑說：「真係比人哋嘥多好多口水，不過習慣晒㗎喇，小朋友好似一張白紙，要耐心同佢哋解釋。」
為了子女，崇德甘願放棄一切，他說：「我呢幾年將工作同進修搬晒番屋企，我想多啲時間留喺屋企，目的要對子女多啲，等佢哋朝早擘大眼見到我，瞓覺前又有我喺身邊。」黐身爹哋其實唔易做，但崇德非常享受，有付出也有收穫，他說：「呢幾年，我真係冇錯過佢哋任何一個時刻，我仲拍低好多video，每年囝囝同囡囡生日，我就剪輯一段短片送畀佢做禮物，講真花錢買份禮物，十幾分鐘畀完錢就得，但我剪片要成幾個星期，但對佢哋嚟講會係美好回憶。」崇德堅持為子女D.I.Y.禮物做到老。
賀卡畫滿心
日希醒目可愛，他即場教妹妹日晴齊唱兒歌爸爸，他們又發揮創意，各自設計了父親節卡，日希在畫紙上畫滿心心，日晴則繪畫了全家福，二人的圖畫滲滿愛。日希是崇德的貼身膏藥，劉美娟不呷醋反爆料說：「囝囝未夠一歲我就再懷妹妹，當時爸爸負責貼身照顧佢，佢兩父子好好感情。我成日笑囝囝一定係老公陀咗十個月生出嚟，囡囡就較跟我。」日希不及日晴口齒伶俐，但擅用身體語言表達，他毫不吝嗇派吻，最愛跟爹哋嘴對嘴，父子雙唇肉緊黐到實，溫馨爆燈。
