周汶錡（Kathy）與妹妹周麗淇（Niki）等前晚出席灣仔米芝蓮餐廳開幕活動，Niki透露下月加盟新公司，會否做一姐：「不嬲都冇講呢啲嘢，希望做啲新嘗試。」Niki常在內地拍劇，問到身價有否拍住蔡少芬20萬一集，她即笑言：「冇咁多，拍30集嘅話會有七位數字。」問她會否賺大錢置業，她表示：「自己家都係租樓住，之前層樓都賣咗，賺咗40％，自己一個人最緊要係錢，唔好諗住靠男人，不過年底會考慮買樓，目標都係八位數字。」
莊思敏催桃花
此外，曾僭建的莊思敏笑言：「同真比較，確實有啲分別，不過有好又唔好，唔怕地心吸力。」問到有否留意舊愛吳浩康結新歡，她表示：「喺報道睇過，冇問過佢，自己都會努力，已經喺屋企努力執緊啲風水，同風水師講事業同桃花都好緊要。」
採訪：梁錦雯
攝影：陳俊強
