歐洲國家盃已經展開分組賽第三輪賽事，16支球隊都展現了各自的隊形、能力及風格。擁躉們各有表述，最傷的肯定是荷蘭躉，皆因兩戰皆北。這支2010年世界盃亞軍球隊已經伸了半隻腳上飛機，準備由波蘭直飛阿姆斯特丹，確係有點羞家，這時我又想起阿叻那張服輸卻不服氣，時紅時綠的臉。
在過去的一個星期，我聽得最多的一句話係，「唉！隊荷蘭都唔知搞乜，踢成咁！」，其次係「有英超神射手尹佩斯同德甲神射手亨特拉爾又點，連賓特拿都入兩粒，佢哋（荷蘭）究竟想點？」，不過最精警嘅應該係，「荷蘭只要唔出洛賓就有運行，起碼世界盃都踢到入決賽！」咁又係。
最弊荷蘭教練尹馬維克冇西班牙教頭的膽色，你睇西班牙第一場對住意大利，隊中明明有4個前鋒，迪保斯基偏偏一個都唔出，情願出6個中場，真係叫人嘆為觀止，仲同意大利好似跳探戈舞咁，踢咗一場暫時我覺得最緊湊嘅好波。你估荷蘭人夠唔夠膽下一仗唔出洛賓？我冇屋契咋，如果唔係我真係夠膽同你賭！你家陣明白點解我咁同情叻哥未！
講開意大利，真係忍唔住要講一句：「卿本佳人，奈何作賊！」，明明好波偏偏要踢假波，凡係大賽就展示到意大利嘅實力，你話嬲好唔嬲好？我對意大利波向來冇乜好感，但係今屆竟然有卡斯辛奴同巴洛迪利，一個傻一個癲，令到有啲沉悶嘅意大利波忽然活色生香，有趣味起來。
講到呢度，冇可能唔講我心頭塊肉英格蘭，第一場波對住法國，有本事攻門三次竟然有一個入球，喺法國身上搶到1分；對瑞典場波過程雖然好似坐過山車咁，但你咪理，鶴臣喺60分鐘將禾確特換走占士米拿，一射門一助攻，建奇功穩袋3分，再加埋放棄里奧費迪南留住泰利，令我不得不畀個like鶴臣，收回當日對佢嘅批評！總結第一個星期嘅表現，好滿意。
文：盧覓雪