黃翠如（Priscilla）在有線打滾九個年頭，做到想點就點的位置，卻突然跳槽無綫，推倒一切重新起步，多年來自認信心不足，儲了九年，才儲夠自信換張入場券踏入無綫大門，性格影響命運，兜了個大圈，Priscilla再也不能錯過機會，決心勇往直前，打死罷就！
撰文：羅美倫
黃翠如剛於4月加盟無綫，將於7月首次正式拍劇，原來03年任有線娛樂新聞台主播、07年轉做旅遊節目主持及拍電影做女主角的她，因不想演戲而離開有線，兜兜轉轉，最終因為想演戲而簽約無綫。路走遠了，年紀也漸大了，沒自信的Priscilla的起心肝把握時機：「以前自覺冇乜能力做戲，係好sharp嘅人至可以做，但今日連呢個機會都冇埋就唔使諗，我唔想因為自信心不足而放棄，其實家都唔夠膽㗎，死就死啦！」
規矩處處常被鬧
跑回起點從頭來過，Priscilla得把自己視為新人：「真係乜都唔識，開工第二、三日就俾收音師鬧，以前公司冇王管，做乜都冇人話，有次拍拍吓節目諗住掉垃圾，我拆咗線就跑開，收音師就鬧話無綫係未得批准唔准拆線，突然覺得自己係新人，要從頭學起。」Priscilla以前愛化淡妝，但無綫就表明不可以，怕淡妝令人感覺不專業，面對壓力，她坦言尚未適應，尤其無綫觀眾多意見也多，只得催眠自己在這裏已工作多年，來消除心理壓力。
在有規有矩的大台看來，細公司的自由就像沒規矩，Priscilla才兩個月已經「瀨嘢」，接受訪問時提及高層名字而被提醒，她也時刻警惕自己要小心言行，不過仍需調適，Priscilla笑說：「試過化咗妝搭巴士去做嘢，俾人話妝會溶頭會亂，佢哋話化濃妝整晒頭唔應該搭巴士，但我唔捨得搭的士喎！以前唔化妝周圍去，係因為冇人認得。」
自認平凡撼花旦
相對無綫花旦，Priscilla自認年紀不輕，但她堅信有存在價值：「無綫啲人太靚，咁靚嘅人好難畀人代入㗎，我嘅賣點係平庸冇框框，靚嘅角色我一定唔得，但以外嘅角色就乜都得，我冇包袱，因為我頭上冇任何光環。」Priscilla一直不敢「高攀」入無綫，累積了自信才膽敢一試：「儲夠信心攞到張入場券，一係入，一係張入場券無效，咁一定要入啦！」把握了機會，Priscilla只得勇往直前，不望大紅大紫，只望被認同她的存在價值。
唔恨做少奶奶
跟黃翠如同期的有線主播余思敏嫁了鄭中基做少奶奶，陳貝兒和區永權也分別結婚生仔去，Priscilla卻選擇重新開始，加入無綫大家庭，由好友梁嘉琪陪她踏出重要一步，走她想走的路。
問到Priscilla可有羨慕余思敏？她說：「完全冇，佢好幸福，我替佢開心，但我亦替自己開心，我仲可以喺自己想努力嘅方面仍然努力，我從來都係小人物，因為可以繼續行，搵自己價值而開心。」
