噚日係一年一度嘅父親節，唔少圈中人要忙於做嘢搵銀陪唔到爸爸，但亦有部份人爭取時間同父親大人慶祝，其實姑勿論陪唔陪到爸爸，即使只係輕輕嘅一段留言或者一餐茶，相信一班爸爸都一樣咁開心嘅。好似已經做咗人老竇嘅李克勤，雖然近日要捱夜睇歐國盃，但噚日父親節佢都一早約埋爸爸同外父齊齊飲茶慶祝，克勤仲預備埋蛋糕，三個老竇坐埋一枱真係好開心。
DJTommy收大禮
同時，家懷胎約五個月嘅黎姿，就腹大便便咁陪老竇飲茶，雖然有身孕，但黎姿個樣冇乜點變，依然係索媽咪一名。至於台灣藝人林熙蕾，就喺微博貼出老公Chris輕吻乖女嘅相片，相中見林熙蕾囡囡戴住個頭箍仔相當可愛，唔怪得林熙蕾同老公當正囡囡係掌上明珠。
DJTommy嘅老婆日前生咗對龍鳳胎，DJTommy喺微博留言話原本囡囡要做心臟血管手術，但喺父親節前，囡囡條血管情況有改善，可能唔使做手術，難怪DJTommy話呢份係父親節嘅最好禮物。另外，房祖名同胡定欣都喺微博貼咗同老竇嘅合照，大晒溫馨。