我求大俠都幾鍾意睇日本啲繙譯小說，估唔到俄羅斯前鋒艾沙維同我咁啱嘴形；喺前晚對希臘場歐國盃A組出線關鍵戰之前，呢位阿仙奴球員就俾人影到喺度睇日本作家村上春樹本《迴轉木馬的終端》。佢咁勤力睇書，本來值得一讚，但比賽前睇書就唔係幾老嚟囉；事關「書」同「輸」同音，結果俄羅斯喺被一致睇好下，輸咗畀希臘而出局，真係邪到爆！
足球生涯似小說故事
球星雖然搵錢好多，但成日畀人感覺係盲字都唔識多隻，淨係識得女同夜蒲。咁其實又唔係個個踢波嘅，見到字都想瞓覺嘅；好似喺上季俾阿仙奴借返俄超辛尼特嘅艾沙維咁，就鬼咁有修養。喺前晚對希臘之前，佢就埋頭苦幹，係咁睇村上春樹本《迴轉木馬的終端》，而且仲已經睇咗成半本。我求大俠都睇過村上老師呢本書，所以大約都知係講啲乜。
艾沙維刨緊嘅《迴轉木馬的終端》，係由9個短篇小說組成，內容大致係講都市人所遇到嘅問題；例如為生活而奔波，同埋冇得話點就點。咦！又係幾似艾沙維嘅足球生涯喎；因為佢呢幾年查實發展得唔係咁如意，雖然08年喺歐協盃同歐國盃響朵後，翌年1月就轉投阿仙奴，但係發展得麻麻，仲喺今年1月被借返辛尼特㖭。
睇書紓緩比賽壓力
我求大俠相信，艾沙維睇村上老師呢本《迴轉木馬的終端》睇得咁入神，好明顯係想透過睇書，嚟思考自己嘅人生，究竟應該留喺英超，定係返俄超，定還是去其他聯賽發展呢？我求大俠諗，當佢睇完本書之後，應該就會有答案。除此之外，佢賽前睇書，另一個目的應該係想減壓，紓緩一下賽前嘅緊張壓力；不過，有啲中國人就好忌諱喺比賽前睇書，點解？輸輸聲嘛。我求大俠相信，俄羅斯人唔會咁諗，但又真係咁巧合，沙皇睇完書後，俄羅斯真係輸咗又出局囉！
