烏克蘭的豪雨也太大了吧，深夜目睹它將球星們淋到落湯雞，早上醒來又見它蒞臨窗外。不要怪點解踢波先嚟落雨，鬼叫你踢咁耐咩，EURO頭尾整整三星期，點避都避唔到啦，而這場雷電交加的大雨，雖然製造了一個小時的延誤，但又唔覺意為今屆歐國盃帶來另一種風景。
當看台上絕大多數球迷都走埋一邊避雨時，很少數的淋雨一族就搶晒鏡了，因為全世界電視台都還在直播中，所以有心博影相的就不能錯過這黃金一刻，結果我們確實看到了一張經典，一位雄赳赳的男球迷，左手將女友一擁入懷激情擁吻，右手則高舉大大支的法國旗，這位法國猛男向全世界的男球迷宣示主權！在惡劣逆境下，男人仍然堅持人生中的兩大精神支柱──愛人和足球，這就是男人味！
落雨不是末日，其實波係可以照踢的，只不過我們習慣了以為落雨球場就要封場吧。某年某日，我們一大班肥佬訓練班成員以球賽作畢業禮，可惜當日一早掛了黃雨警告，大家都擔心能否波照踢，我當時戰戰競競的問場地負責人會不會封場時，佢話：「封唔封場，你哋踢波嘅話事啦！」結果我們就像在水池裏嬉水一樣踢波，狼狽但難忘，好玩到極！
中學時代試過因打風早放學然後一班人走去踢波，那種集體合法逃學，嘻嘻哈哈渾身濕透然後取笑其中某位底褲現形了的日子，今日諗起都笑死，惟有哼番句「下雨天總掛念從前，球場上那可愛片段……！」
報紙檔老闆很討厭下雨，懷春的少女卻等你好耐，又是那些年，自己試過狂奔50米搶住扮好人遮埋隔離學校那位無帶遮的女生，結果人是追到了，卻換來一句「唔使嘞唔該」，好在無人睇到。人大了很討厭帶遮，其實是討厭自己帶遮又唔見遮，索性唔帶，結果最近兩次有陌生的好人主動遮埋我，為免令人尷尬，我無拒絕。
如今雨天的最浪漫，是女兒放學後和我一起在「水氹」上飛奔，一件風褸下的兩父女在街頭左閃右避的樂趣，媽媽們應該不會看得過眼……
文：keyman