華華同好多書蟲一樣，去台灣其中一個任務就係去誠品掃貨。呢間令到香港人趨之若鶩嘅書店，已經鐵定喺銅鑼灣希慎廣場（三越百貨原址）8至10樓落腳，面積超過3.6萬平方呎，近日行經過，華華見人人都抬頭仰望呢座銅鑼灣新地標，仲有網民話下個月書展唔會買咁多書，一心一意等誠品8月開幕。
據了解，希慎廣場平均呎租達150蚊，但傳聞誠品就以每呎30蚊超筍價承租三連層靚舖，怪唔之得能夠衝出寶島，喺地產霸權下嘅香港「落戶」。但就算係每呎30蚊，以樓面計，月租都要108萬，唔係嘢小。
希慎發言人向華華講，佢哋同誠品係屬於「策略性的合作關係」，唔評論個別租戶租金水平。不過，誠品唔會好似台灣咁24小時營業，但開放時間一定長過香港本土書店。喺香港插旗後，誠品自然遠望神州，未來兩年會喺中國開第一家旗艦店，但暫時就未定邊個城市，不過，早排誠品方面曾經透露地點係蘇州。