市場預期希臘右派勝出大選，憧憬各國央行聯手放水，加上傳聞中央向香港送大禮，令上周五港股爆上425點。不過，晉佳覺得無論希臘左派定右派當選，對市場都唔係乜嘢好消息，分分鐘引發德、法陣營喺財政協議問題上開火，估計港股有機會出現新一輪單邊跌市，繼上周分析歐洲形勢後，今日就回顧吓關鍵指標嘅技術分析。
恒指日線圖上周五升破之前已跌穿嘅擴散三角形支持線，完成後抽，去到晉佳講嘅反彈目標位，暫時重越支持線，加上以大陽燭上升，成交增加，技術上短線有好轉迹象，但擴散三角形反映嘅中線強烈利淡趨勢依然未改。
再睇月線圖，恒指5月份已造咗支大陰燭，過往10年，有3次恒指轉升為跌並出現大陰燭，兩個月都會出現多一支大陰燭先回穩。按此規律，下一輪跌市唔係今個月，就係下個月。
至於關鍵支持位，恒指自07年11月形成一個超大型對稱三角形，支持線大概喺17450，一旦明顯跌穿就確認長線弱勢，睇量度跌幅係低過零，估底已經冇意思。另外，月線圖保歷加通道一向可靠，上月就係受制保歷加通道中軸，然後大跌，如今下軸大約喺17100，通道有向下擴闊迹象。換言之，恒指肯定仍處弱勢，跌穿17000嘅話跌勢會再加劇。至於月線圖RSI，恒指年初反彈並輕微突破50中軸，然後5月就掉頭跌至40附近，確認處於長期跌市階段，未見30樓下好難話見底，整體形勢唔太樂觀。
9RSI未穿30難言見底
睇埋美股道指月線圖，長線指標月線圖9RSI分別喺舊年4月嘅75.8同今年4月69.3見頂，形成雙頂背馳，舊年9月低位去到41.2，上個月就係53.1，以一般頂背馳形態嘅走勢，月線圖RSI之後一般會跌穿41.2先會反彈，長線轉弱趨勢形成嘅話，仲會去到20至30嘅超賣區，道指有長線下跌迹象，至於乜嘢水平見底實在難以想像。
港股短線仲有冇得繼續去，圖表顯示未清楚，但係長線趨勢似乎凶多吉少，既然家係似大跌市嘅反彈途中，所以晉佳開始全面睇淡。須知從長線技術分析預測嘅趨勢，準確度往往較中短線高得多，所以嚟緊要有環球大熊市嘅心理準備。
晉佳
本欄逢周一、三及五刊出