國家主席胡錦濤今年7.1訪港，除了出席回歸15周年慶祝活動，另一目的是要為民意基礎不穩的新特首梁振英「打打氣」，擺平建制陣營內的反梁聲音。據知，胡錦濤會接見商界人士，包括力撐唐英年做特首的「死硬派」，希望他們支持梁班子。有商界人士認為，胡錦濤就算親自出馬要商界挺梁，也只是治標不治本，商界總有辦法陽奉陰違。
據了解，自3月特首選舉結束後，中央雖然要求梁振英與唐營中人「大和解」，但知情人士指出，中央評估形勢後認為「大和解」並不成功，一切只屬應酬式，「大家只係食餐飯，見吓面，出嚟影張相，之後就冇晒下文。近日梁振英俾人不斷攻擊，完全唔見有商界撐佢，同董建華、曾蔭權年代完全唔同」。
被指治標不治本
中央也曾要求部份挺唐超級富豪高調轉軚挺梁，但反應冷淡之餘，近日更有打算淡出政圈的挺唐人士公開發表一些不利梁的言論，顯示商界與梁仍是面和心不和。所以，胡錦濤為大局着想，訪港期間將會見商界人士，表達中央要求商界挺梁的意願，「證明係中央最高決定，唔好再有人玩嘢搞亂中央佈局」。
另一商界人士卻指出，胡錦濤就算親自出馬也只是治標不治本：「只要佢哋（商界）乜都唔做、唔郁，唔配合政府，已經足以搞到梁振英好頭痕，唔通中央到時又插手，逼商界投資、唔准炒人去配合梁振英咩？」
《蘋果》記者