本屬PSN小品嘅《東京森林》，點估到喺日本「每周銷售」上過No.1、香港同台灣相繼斷貨，可算係Game界五窮六絕中嘅黑馬。可能大家對型男索女主角玩到膩，呢款轉行扮畜牲橫行東京嘅動物求生遊戲，機迷出奇地Like。無他嘅，《GTA》式明爭暗鬥媾完女再交配，正正係大家生活中之寫照，梗有共鳴啦。
記者：徐影龍
為求存 見高拜見低踩
舞台設計為人類已全滅、變成廢墟嘅東京澀谷，遊戲目的只有一個，就係想盡辦法生存落去。簡單唔代表無聊，不論你扮演松鼠狗抑或金毛獅王，目的都係一樣，在每一區霸晒四個指定目標，該地盤就屬於你，跟手區內有兩隻正值發情嘅乸出現，按你當時等級高低，而揀選一隻最好嘅乸嚟交配，等級越高所生嘅下一代就會越多，而且攻擊、防衞等數值都會高啲。之後就改為操控你嘅下一代，向另一地盤進發。
若然途中見到比你巨型、比你兇惡嘅動物，最好匿喺草叢又或繞道走；遇到小雞一家大小出嚟散步，你就嗱嗱聲飛撲出去搵佢哋嚟醫肚。殘忍？係咁㗎喇，現實中都係見高就拜，弱肉強食㗎啦！好似一開波操控嘅松鼠狗咁，食完雞仔升完呢，咪開始搵豺狼、老虎開餐囉，澀谷稱王後無動物再敢詐你型，同現實世界一樣笑貧不笑娼啫。
老虎斑馬 唔同玩法
遊戲設飽肚值，逼你不停四出狩獵，不過都有分肉食性同草食性，好似獵豹、鱷魚一類，梗係食牛扒雞扒啦；而梅花鹿、大笨象一類，就要去指定地方食草醫肚。驟眼睇，食草動物要避開所有猛獸，兼且忍氣吞聲兜路行，理論上生存難度最高，點知望下PSN上嘅排行榜，頭一、二位都係斑馬類草食性動物，仲要生存年份高達500幾年，比我苦練嘅松鼠狗只有30年命，實在長命得多！原因草食動物跑得快跳得高，逃命、霸地盤快人一步，而且生育下一代嘅數量，比肉食動物多一倍以上，正所謂膽正命平有排死，所以兩類動物嘅攻略法絕對大相逕庭，令遊戲更多變化。
只須喺「求生模式」內，搵齊三本研究報告，就可解鎖一個短篇故事，內容又鬼馬又過癮。好以土佐犬嘅「敗犬」、扮《MGS》潛行暗殺嘅「米格魯任務」等，每每令玩者笑中有淚，行貨有埋中文，令你更明白精采劇情，難怪港台同告缺貨。
《東京森林》
機種：PS3
類型：AVG
人數：1-2人
售價：$328
