今時今日買個旺角舖位「億億聲」只屬等閒，但又有幾多人買得起？剛榮升美聯集團銷售總監的黃子華擅於舖位尋寶，即時露兩手，私人醒張「旺角舖位尋寶圖」，「旺角核心街舖只係千零萬！仲可以博潛龍飛升，舖價五級跳都唔奇！」
石頭變翡翠 爛銅變黃金
「舖位最引人入勝嘅地方，就係可以用石頭價錢買到翡翠，最好係買嚿爛銅，捽捽下變咗黃金！」美聯集團銷售總監黃子華認為，這是考驗投資眼光最高境界，所以舖位一直被視為投資物業終極版。
早在4年前，他發掘中環冷門舖位，當年舖價都只是數百萬元而已，現時「中環」二字，無4,000萬元都「唔使諗」，短短幾年飛升10倍。
女人街
旺角核心區最平舖位
今日旺角舖價亦貴到癲，仍有尋寶遊戲玩？黃子華相當睇好女人街，即通菜街。
「女人街係旺角核心區最平舖位，現時一個600呎舖位，千零萬已經有貨！但同一地段花園街舖價至少都要7,000萬至8,000萬，西洋菜南街唔少舖價都要2億！」女人街位處花園街及西洋菜南街中間，但舖價竟差天共地，就是因為有牌檔，所以令舖價落後大市。
女人街雖然有牌檔遮擋着街舖，但空置率卻極低，主要經營各式食肆，而且已經成行成市。他解釋說，現時要在旺角核心區經營生意，尤其是食肆，但又付不起十幾廿萬昂貴租金，數萬元租金的女人街，就是小型食肆唯一選擇。
「女人街夾正花園街、西洋菜南街中間，無論由花園街去西洋菜南街，或係由西洋菜南街去花園街，無可能唔經過女人街，而且女人街仲係自由行必到地方，但女人街舖位只係花園街、西洋菜南街十分一價錢，係一條被扭曲的街道，平咁多點解唔抵買？今日買女人街舖位唔會衰，一般收租2厘幾，舖價千零二千萬，亦唔係超溢價，買個好少少嘅住宅單位都要啦！但問題係需要等，尋寶味濃！」他指出，「如果有一日政府規範牌檔，將女人街牌檔搬走，咁就真係發達！到時舖價五級跳都唔奇！」
廣華街
邊皮地區尋寶
近年旺角核心區不斷向外擴散，令一些周邊地區成為尋寶好機會，黃子華指出，廣華街屬於旺角區邊皮，但同時又有不少主題商場，包括有遊戲機主題的好景商業中心，軍事模型主題的仁安商場及「潮流地域」商場等，自從米芝蓮星級點心店「添好運」於幾年前落點後，經常出現排隊人龍，帶旺該處人流，令最近幾年廣華街也正逐漸轉型中。
另外，隨着日後洗衣街水務署旺角辦事處重建，區內變天在即，估計由最有升值潛力的黑布街、洗衣街、染布房街一直擴散開去，廣華街將同樣受惠，而且坊間亦有傳，旺角火車站太細，將會搬遷擴大月台，而最大機會是移至廣華街一帶。他認為，未來廣華街無論位置及交通，將會發展得更好，令人流更旺。
登打士街
世界特色小食 自由行落車點
黃子華的心水舖位，還有雲集世界各地特色小食的登打士街一段，加上隨着廣華醫院重建，他亦睇好登打士街。「呢條街屬於旺角核心，而且好特色，舖位都係細細間，客人買完就企係街食，好似台灣西門町。」他指出，這段登打士街亦是自由行旅遊巴落車點，內地遊客落車後，嚐過特色小食，便會走入女人街逛逛，同時亦會帶旺周邊街道。現時買登打士街舖位，都有不俗升幅，不過，由於街道始終太短，舖價絕對不平宜，最近「亞升麵線」舖位就以高達8,000萬元沽出。
尋寶舖位投資期長
黃子華提醒投資者，周邊環境變化，對於舖位本身價值起決定性作用，舖位會否爆升，主要視乎市容有沒有改變，旺角區內有多個重建項目，將來要升一、兩倍亦非難事，但需要時間等待，3條尋寶街舖位，投資期會比較長，至少需時3年。