本人過往不乏買樓經驗，都以二手為主，早前首次學人買一手樓，終於見識到甚麼是「擠牙膏」、迷魂陣，眼界大開，但都不及現場所見的憂愁臉孔，令我印象更難忘。
買的是九龍區一個單幢精品，唔平㗎，呎價成
萬四、五蚊，但因為面積較細，銀碼好似唔大，屬於「上車」盤。買咁貴樓，但沒有上賓招待，大家乖乖抽籤排隊，這一刻，似係我求佢賣樓畀我！
等候揀樓時，不忘眼觀四周，我以為此盤係投資者居多，但眼見有好幾個後生仔，係由父母帶住來買樓，只見佢哋一臉愁容，係嫌貴？還是驚買唔到？我唔肯定，總之並唔係開心買樓，而係好迷惘，為咗兒女忍痛落注個種感覺。
我諗，很多年長父母這一兩年買樓，都經歷強烈的心理鬥爭，佢哋從未見過樓價咁貴，而且見過樓市暴跌，但眼看子女自立無期，加上樓價「唔會跌」的普遍思維，唔係個個子女都有能力儲首期，唔靠父母，仲可以靠邊個？在嚐過樓市甜頭的上一代眼裏，買樓如同讀大學，係必需品。有這班中產客打底，樓價短期內真係難以暴跌。
讀者 陳大文
本欄園地公開，歡迎各界來信，以450字為限，請電郵至mailto:[email protected]，註明《家》樓民講場，請留聯絡電話。編輯保留文章的刪減權。