自從許曉暉的名字與文化扯上關係後，業界抨擊的聲音就永無休止，更被嘲「有紅色背景，無文化背景」。看着讀工商管理、出身自銀行界的女兒受盡壓力，70歲父親許宏全接受本報專訪時劈口就說：「咁多個司局長職位中，最難做就係文化局局長，文人係最難管，因為文人相輕呀！」
未開場就鬧是不公
「電影、戲劇、出版、演藝，香港文化界冇一個可以瓣瓣精通。」對於文化界「拒撐」許曉暉，許父不忘為愛女護航：「佢有冇能力，至少畀半年時間睇吓佢表現；電影未開場就鬧套戲唔好睇，咁係唔公平嘅。」
深知女兒近日飽受壓力，作為父親的許宏全痛惜的說：「我希望佢只做一屆，45歲退休算啦……文化局局長呢份工一定係會受好多委屈，我話過佢，食得鹹魚就要抵得渴！」他更暗爆，女兒加入民政事務局做副局長時，已知自己藝術文化底子差，即時請粵劇界大老倌到家中惡補粵劇知識，「佢學咗大半年，家都唱得唔錯㗎。」
1968年在廈門大學化學系畢業的許宏全，對文化局局長的工作自有一番理念，「大師級嘅畫家，只能係叫業務精通，未必識得管理；文化局局長係推行政策，屬行政管理；業務同行政係兩回事」。
插曾蔭權眼光短淺
考慮退休的許宏全，現準備結束內地部份生意，希望長期留港享受弄孫的天倫之樂。
不會打牌、不懂賭博及不識飲酒的他自稱：「我冇乜興趣，退休就係一個孤獨老人囉。」但對教育兒女，他頗有心得，「坦誠、寬容、中庸、豁達；係我教仔女嘅八字格言。」許父續說：「孝、忍、勤、省」四字，則是前年去世的妻子，生前教育兒女的真理。
堅稱不想多談政治的許父，在訪問時，不忘插曾蔭權一刀：「為乜唔自己買船飛坐船呢？租屋可以等到退休先租呀。特首做啲咁嘅嘢，眼光太短淺，毫無政治敏感性，給人留下話柄，搞到今時今日的局面。」
《蘋果》記者
許宏全夫婦教女真言
八字格言
坦誠：對朋友要坦誠及講信用
寬容：對下屬要持寬容態度
中庸：做事要取中庸之道
豁達：人生得失要豁達
四字真理
孝：百行以孝為先
忍：凡事要忍讓
勤：勤力做事
省：每天反省自己