【橫店直擊】蔡少芬（Ada）主演的劇集《甄嬛傳》在內地收視爆燈，帶挈人氣急升，有指Ada酬勞三級跳至每集收20萬。昨日Ada帶囡囡在橫店開工拍無綫劇《金枝慾孽貳》，她坦認已經加價，不過正當人人離開無綫返內地搵人仔之際，Ada自言會飲水思源不會飛起無綫。
無綫新劇《金枝慾孽貳》一眾演員近日到上海橫店拍攝，昨日Ada和陳豪等人在現場拍宮廷戲份，但兩人未有對手戲，由於當地天氣炎熱太陽又猛，工作人員要舉太陽傘為演員遮蔭，現場又有遊客要求和Ada及陳豪合照，兩人都來者不拒，表現親切。
囡囡出疹發燒
雖然Ada在橫店拍劇，但她也帶着一歲多的囡囡楚兒在旁，Ada說：「其實囡囡好細個已經成日跟住我飛，5個月大我就帶佢去法國，出外係冇問題。」不過她透露囡囡早前因出玫瑰疹而發燒，發足三日，幸好到橫店後已沒大礙，Ada還踢爆陳豪說：「佢講笑話我個女咁大隻，叫我唔使擔心。」
Ada和內地女星孫儷合演的劇集《甄嬛傳》收視強勁，帶挈她們人氣勁升，近日有指Ada的酬勞躍升至每集收20萬，Ada昨日坦言估不到劇集會有如此大迴響，雖然她否認酬勞升至20萬，但她坦認加了價，她說：「最近經理人係幫我調整過加咗啲，自己梗開心，對我算係獎勵，辛苦都值得。」
如此好搵，Ada豈非只需返內地拍劇索性飛起無綫？但她卻說：「我家都拍緊TVB嘅劇，其實市場咁大，我係一個飲水思源嘅人。」她又表示若果劇本好，即使減少少酬勞也沒所謂。
翠翠跌倒傷腳
此外，葉翠翠到橫店第三日，因在房間跣腳跌倒，令右腳腳掌附近的骨爆裂，現在要用枴杖行路，她說：「照過X光，醫生話要打石膏，但我唔想影響拍攝，所以堅持唔打，醫生要我瞓床，足足瞓咗五日，今日第一日離開房落嚟大堂。」曾跟翠翠傳緋聞的韋家雄也有份拍攝，翠翠坦言他沒有問候，相反跟她同病相憐整傷腳的緋聞男友高鈞賢則有sms慰問。陳豪就表示加入無綫後一直未有機會返內地拍劇，他也想有賺人仔的機會。
採訪、攝影：曾小嘉
