吳嘉龍（Carl）日前與父親吳耀漢接受電視台訪問，預祝父親節，蠱惑的Carl炮製六粒糖的小咖啡「孝敬」父親，而吳耀漢亦鬼馬自言愛飲甜咖啡。父子二人鬥爆陰毒，吳耀漢向Carl詐型，指他無心少見面，而Carl亦報寸指父親對外人鬼馬，在家是嚴父。
吳嘉龍與父親吳耀漢聚少離多，日前齊齊接受電視訪問，預祝父親節。一向鬼馬的Carl即場炮製愛心咖啡孝敬父親，他竟在小小的咖啡杯加重料，落了六粒大方糖，甜言要父親有甜到漏的感覺，而吳耀漢亦不示弱，他亦搞笑地表示：「知我心意鍾意飲甜咖啡，這杯咖啡唔會太甜，味道啱啱好，算你識做。」Carl在旁透露：「平時會炮製英國奶茶畀佢，逢假日佢一起身都會嗌我整畀佢飲。」
吳耀漢在家嚴肅
問到Carl加入娛樂圈後會否因工作忙而少見父親，吳耀漢即詐型說：「都唔係嘅，同係咪入咗娛樂圈無關，你想見、有心見咪見多啲，冇心見咪見少啲囉。」再追問他Carl有沒有心，他即笑言：「即係冇心囉，你忙時你估我唔忙，我夠忙咯。」
吳耀漢更自爆對兒子私生活一無所知，在旁的Carl則踢爆：「雖然爸爸為人好搞笑、好funny，但喺屋企變得好嚴肅，展現嚴父嘅一面。」
家輝日日父親節
此外，育有一對孖女的梁家輝前晚到大坑接受now節目主持陳海琪的訪問，他透露現在放假中，更計劃暑假一家人到外地旅行：「近日聽到各地唔同消息，好似台灣又水浸又地震，真係諗唔到去邊，如果我一個人就話去邊都冇所謂。」
梁家輝坦言希望放到9月才開工，為新戲《寒戰》及《太極》宣傳，故爭取多些時間陪老婆及一對孖女。問到如何慶祝父親節，他聞言才如夢初醒：「父親節咩，真係唔記得，咁我要打電話畀爹哋先。」至於自己則覺得每天也是父親節。會否想女兒送卡作禮物？梁家輝笑說：「佢哋就想收到我嘅卡（信用卡）。」
採訪、攝影：魯萍
