早排傳過李思捷因為同模Naomi（馮鎵瀅）行埋，所以飛咗正印女友春卷（王寶寶）。不過假的真不了，前日傍晚6點幾馮仁昭見到思捷同春卷蹺住手喺中環ifc行街。
春卷尷尬
其實除咗Naomi之外，思捷之前都俾人影過同唔少女仔出雙入對，但春卷都對佢不離不棄，可能思捷真係有過人之處啦。前日思捷同春卷去咗AppleShop喺ifc嘅旗艦店，佢哋對部NewiPad好有興趣，仲不停咁問店員有關部平板電腦嘅資料，但經過差不多半個鐘嘅糾纏，佢哋都係空手而回。
離開AppleShop嗰時，思捷發現咗記者，佢即刻冇再同春卷蹺住手，只係平排而行保持距離。之後兩人就急步行去等電梯，春卷表現得好尷尬，反而思捷就發揮佢嘅扮嘢本性，不停咁chok樣畀記者睇。
去到電梯大堂時，思捷問喺咪附近有活動，記者就笑佢少出嚟行街，其實ifc一向都係藝人出沒熱點，記者喺度搵料一啲都唔出奇，跟住記者問思捷點解唔當眾錫啖女友，思捷就話：「大家咁熟，唔好玩啦。」