【我得寵】愛心爆棚的萬綺雯與老公陳十三養貓多年，貓兒為沒有孩子的陳生陳太帶來不少歡樂，但隨着牠們逐漸老死，萬綺雯一次又一次的傷心，她坦言待愛貓全部百年歸老，將不會再養貓，免自己重複地傷心。
撰文：羅美倫
萬綺雯（蚊蚊）家裏養了六隻貓，最多養過八隻，因為老公名叫十三，貓咪的名字順理成章地叫十四、十五、十六，如此類推，最後來到陳家的是二十一。陳十三某年在街上執了貓BB收養，改名十四，十四一直病重，陳十三替牠做人工呼吸都救不過來，及後收養了酒吧遺棄的貓爸爸十五，及應朋友要求收留的貓媽媽Matthew，就誕下四隻愛情結晶十六、十七、十八、十九，今年已屆十六歲了，蚊蚊說：「老公話我嗰陣冇嘢做，就買咗二十、二十一畀我，我幫佢哋改名叫BB同精靈。」由於十五、十九相繼離世，現只剩六隻貓咪在陳家過着優哉游哉的生活。
中醫秘方救病貓
蚊蚊與陳十三可謂愛心爆棚，就算是買回來的二十、二十一，也是寵物店失寵份子，牠們都是被店主說成沒人要就人道毀滅，陳十三便一一將牠們買回家送給老婆，蚊蚊說：「二十返嚟嗰時眼、耳、皮膚都有事，醫咗幾個月，但值得嘅。二十一都慘，佢BB時好細粒，又有嚴重皮膚病，不過好聰明，第一日叫佢精靈，一叫即刻走埋嚟。」雖然愛心似被人利用，但他們都不介意，見到貓咪健康就開心，陳生陳太堪稱慈善貓王。
貓媽媽Matthew生下的仔女都有家族甲狀線問題，十七連腎都有事，但未減蚊蚊與老公對牠們的愛心，蚊蚊朋友到愛護動物協會領養了貓咪，她甚至會先帶返自己家裏養，直到打完針沒事才送回給朋友，蚊蚊家如中途宿舍，她說：「嗰次隻貓不停屙，好多獸醫都話冇得醫，結果我睇中醫，中醫師話畀同仁堂藿香正氣水佢，早晚餵幾滴，飲到佢嘔晒白泡，不過三日後冇再屙，好番晒至畀番個朋友，家養到肥肥白白好得意。」
生離死別喊餐死
蚊蚊待貓如待人，大讚貓咪有靈性，每次陳十三駕車返家，牠們自然會走到門口守候，養了十多年，培養了深厚感情，蚊蚊為貓咪喊過很多次，甚至喊到左面神經線發炎要睇醫生。
兩年前十九病逝時，蚊蚊喊足個多月：「十九臨終嗰日老公一早出去返工，但突然取消開會黃昏返嚟睇佢，好似知道佢要走咁，老公抱住十九，佢掙扎一下，貓一掙扎即係要走，我喺旁邊喊到講唔到嘢，老公就抱住佢傾偈，跟住再冇掙扎，我哋兩個一齊喊，我問老公佢係咪走咗，老公摸過冇呼吸冇脈搏話係，我接手抱住十九繼續喊，點知佢突然間又掙扎幾下，嚇到我個心都跳埋出嚟，忍唔住同老公笑，但佢跟住真係走咗。」經歷愛貓死別，往後仍要傷心六次，蚊蚊坦言難再承受，故當牠們百年歸老後，不會再養，免自己再傷心。
追蜜蜂半天吊
貓咪離世令萬綺雯傷心，但也帶來不少歡樂。蚊蚊某日在房內聽到幾隻貓咪在外邊玩得很嘈，出去一看，只見白面的十六滿嘴都是顏色粉末，面上一撻撻黑色，原來牠一口咬住隻蝴蝶，蚊蚊還以為牠中毒。
笑料一籮籮
另一次更搞笑，蚊蚊笑說：「有次隔離婆婆燒樹，薰到好多隻蜜蜂飛入屋，佢哋就追住啲蜜蜂，我聽到佢哋走嚟走去，冇耐就聽到好悽慘嘅叫聲，出到嚟就見到三隻貓掛咗喺幾呎高嘅窗紗上面，好似掛飾咁，半天吊，笑死我！我要幫佢哋逐隻爪拆落嚟，拆嗰陣佢哋仲好惡咁。」