荷蘭輸足兩場，但數字上還是未出局住，有理冇理都要鬥埋第3場先至out；橙軍粉絲仲抱有一絲希望之際，反而班球星就有點意興闌珊，對德國最後幾分鐘的無厘神氣，就可見球隊有幾唔齊心，球迷想玩耐啲，但係大把嘢玩的球星們卻趕住走。
英格蘭仲有排玩，變髮成功的朗尼亦令人期待，但係搏殺期間卻出現了第一位英格蘭傷心人，名為哈利列納，4個月前佢曾帶領熱刺高踞英超第3、兼且成為國家隊領隊大熱人選；呢位甚有觀眾緣嘅unclebear，一心諗住跳船做英格蘭第2個最有權力的男人，可惜喺討價還價唔憂嫁之際，足總最後嫌佢官司纏身隨時有手尾跟，最後寧願要悶蛋但身世清白嘅鶴臣，搞到最後列納跳船不成，惟有跳海。
熱刺同佢解約肯定得到婦女們支持，鬼叫你當白鹿徑係二奶咩。
感情玩不得，球迷們投入支持球隊亦要有紋有路，俄羅斯今屆打得咁好，正是時候食住上歐洲一線之時，卻因為球迷暴亂搞到歐洲足協話要重罰，分分鐘會影響俄羅斯參加2016嘅歐洲國家盃資格，搞到俄羅斯發言人話：「都唔明點解球迷闖禍要球隊來孭！」係喎，咁假扮第二隊球迷搞事咪可以嫁禍畀人？
一人做事一人當，克羅地亞有位女球迷又係因為行為過激而要畀公司罰，呢位打緊政府工嘅姐姐喺克羅地亞贏波後，興奮得滯揭起上衣自拍，然後擺上網分享，結果引來上司不滿，並且話要紀律處分㖭！所以話上交友網站呢，真係唔應該add番自己嘅上司㗎！
文：Keyman
now節目主持