蘋機會：防水DV無線掟片　濕影直上雲端

呢個年代，見過食過，只要係騎呢得意嘅嘢，大家都鍾意將視頻、相片即時掟上網，與眾同樂。不過專為夏日而設嘅防水IT產品，老話題總是說幾多級保護，無新意囉！新返IONAirPro就加入Wi-Fi無線功能，莫講話深潛10米無難度，實時串流、即時掟上facebook亦能輕鬆辦到。

記者：陳國輝
攝影：楊錦文
Model：Shiya@GME淘女郎

實時串流變防水CCTV

咪畀佢恍如手電筒嘅造型嚇親，其實，IONAirPro屬於運動型攝錄機，佢所以設計到圓碌碌，原因係要安裝落頭盔、單車手柄等運動器材上，以便進行攝錄；而跟機亦附送一支任扭任擰嘅小腳架，畀你放喺沙灘、泳池邊，㩒個掣就錄影，拎起手玩，簡單如小朋友都曉用。
但講到最特別，始終係機底個Wi-Fi裝置，啟動之後，你只需利用iPhone、iPad或iPod單撈專用程式《IONCAMERAAPP》，以便互相連動，例如將手機變為ION的實時觀景器，囝囡喺水上耍樂，父母在岸上觀看串流，就好似防水CCTV咁好用！現場試玩，畫質尚可接受，只係間中窒格，但必須注意，萬一ION潛入水底拍攝，Wi-Fi訊號便會即時中斷。

■跟機配件勁多，有適合單車或運動頭盔之用嘅架。

■ION鏡頭又圓又凸，賣相成支手電筒咁。

■以MicroSD作儲存，唔夠仲可Up上雲端。

■佢唔係電池，而係可拆出嘅Wi-Fi配件。

8GB雲端隨時掟片

齋玩實時串流一定唔夠喉，如果加埋Share功能，相信一眾facebook以及YouTube同好必定Like！由於ION為顧及輕巧便攜性，所以機身不設任何Display，無Menu介面亦無得預覽，但假如你想將短片即拍兼掟上網，其實下載iOS《IONCAMERAAPP》喺iPhone、iPad等裝置內，便可以簡單嘅方法達成心願。
只要Click幾下，就能夠立即Upload影片上網，同社交網站班老友齊齊睇；甚至乎廠方已為玩家提供8GB免費雲端儲存空間，呢一項服務相當體貼實用，唔單止記憶卡唔夠位可暫存在雲端，延伸進一步玩法，係Upload完影片後，一班Friend或工作小組，可齊齊分享即時睇，總之一駁上雲端，玩法同實用性肯定大大增加。