英格蘭領隊鶴臣教波叻唔叻，我求大俠未敢下定論住，不過就肯定佢好識同球員搞關係；三獅兵團喺禮拜一打和法國1:1後，鶴臣就批准球員喺禮拜三，同自己另一半短聚。希望班英軍咪開心得滯玩過龍，搞到腳仔軟，今晚冇力鬥瑞典就大劑！
猶記得喺06年世盃，當時嘅英格蘭主帥艾歷臣，畀班球員帶埋老婆女友（WAGs）一齊去德國，點知班女就喺英軍駐紮嘅地方巴登巴登搞出事，夜蒲時飲到貓晒，而且仲招搖過市同埋亂咁使錢，事後令英足總非常尷尬；上任領隊卡比路見前車可鑑，唔准隊員帶埋WAGs去比賽，費事佢哋分心。但所謂新人事，新作風，喺今屆歐國盃開波前先走馬上任嘅鶴臣，就採取放任政策，特准班球員喺禮拜三同愛人短聚。
據知情人士話：「領隊鶴臣相信喺適當時候畀球員輕鬆下，等佢哋唔會好似南非世盃咁，喺駐紮地勒斯滕堡悶到抽筋。」來自英足總嘅消息人士又話：「其實，只要班球員攞到平衡，我哋亦唔介意佢哋喺練習同比賽完之後，同自己嘅伴侶短聚一吓。」
高蓮包機派頭十足
英軍部份嘅WAGs喺禮拜三到咗波蘭克拉科夫，其中帶埋佳仔一齊嚟嘅朗尼嫂高蓮，仲使咗14,000鎊（約17萬港元）包架私人飛機去，認真派頭十足；至於泰利嫂東妮亦唔執輸，身上嗰條緊身牛仔褲同埋嗰對6吋高跟鞋，令佢搶盡風頭，成個大明星咁。高蓮落機之後，立即去酒店同朗尼會合，順便補祝結婚周年紀念。至於禾確特同埋菲爾鍾斯，就選擇唔留喺酒店，兩個約埋一齊同自己嘅另一半美蓮妮、佳雅，4個人一齊行街街。
唔係全部WAGs都有嚟波蘭，冇女陪嘅安祖卡路爾、艾殊利高爾、尼史葛、赫特同埋阿歷士張伯倫，就約埋一齊出嚟行街食嘢；點知食食吓lunch嘅時候，突然落起大雨；放假先嚟落雨，唔通連個天都唔鍾意佢哋？
