鍾楚紅昨日以優雅公主造型出席珠寶品牌Chaumet活動，戴上逾500萬鑽飾兼大晒事業線，高貴性感。不過紅姑竟然蝦碌跌下后冠上的鑽石蜜蜂，但見慣大場面的她謂：「唔驚跌爛，係鑽石嘛，所以啲人先用鑽石比喻愛情。」
法國珠寶品牌Chaumet昨日在中環IFC舉行展覽並慶祝新店開幕，身為剪綵嘉賓的鍾楚紅一襲黑色露肩長裙罕有大晒事業線，更戴上蜜蜂造型、總值逾500萬港元的鑽飾。
紅姑聯同Chaumet及IFC高層準備剪綵時，后冠上的鑽石蜜蜂突然掉下，身旁的IFC高層即時替紅姑拾回時，她還一頭冒水，以為跌了耳環，不過，小蝦碌當然未有影響紅姑心情，更賣口乖大讚品牌。
跌耳環執生
事後，紅姑解釋指后冠上每隻蜜蜂都可以拆下做胸針，只是其中一隻蜜蜂扣不緊才發生小意外，她謂：「我唔擔心跌爛，鑽石嘛，所以啲人先用鑽石比喻愛情。」以公主造型現身的她更又嘲是落難公主：「我應該係戴住皇冠走佬，我鍾意自由，唔想困喺宮殿。」
渴求好劇本
紅姑由陳慧琳經理人鍾珍的助手陪同到場，問她是否簽鍾珍做經理人？她表示大家只是好朋友，對於復出拍電影，紅姑謙稱怕無人睇，亦未遇到適合劇本，但直言有興趣拍環保電影，就算要耕田亦無所謂。
採訪：林嘉慈
攝影：陳順禎