舒夫真高周一攻入兩球，幫烏克蘭反勝瑞典2:1，喺歐國盃D組旗開得勝，睇嚟烏克蘭今屆賽事食粥定食飯，都要睇呢把老軍刀喇。但喺周一賽後，軍刀晚上揸車載住有身孕嘅老婆返屋企途中，坐駕就畀人從後撞中，好彩二人都冇事。嘩！入兩粒、撞車又冇事、老婆仲有喜，睇嚟軍刀真係乜都得，隨時勁過超人！
揸波子被隊車尾
軍刀炒車事件，大約喺周一晚，烏克蘭贏瑞典場波完場後3個鐘發生；舒夫真高領主隊贏完波，做埋記者會同訪問，梳洗妥當後就揸佢架全白色波子，同老婆返屋企。軍刀剛駛出基輔奧林匹克球場，轉出十字路口，仍然有大批球迷等待呢位國家英雄，咁佢就好自然收慢架車，費事揩親班粉絲啦；點知尾隨嘅黑色車收制不及，撞到軍刀架靚車。舒夫真高之後落車視察吓情況，結果引嚟更加多球迷圍觀，結果軍刀急急腳上返車，等待警方處理；搞掂之後，佢仲親民地同粉絲簽名、合照一輪，先至揸車返屋企。
老婆有喜軍刀醒神
呢單嘢咁啱就畀閉路電視拍低，烏克蘭國內電視台梗係好緊張咁大事報道，好彩事後證實舒夫真高同佢嘅太太姬絲汀都冇受傷；最令人擔心嘅係姬絲汀，因為佢已經懷有軍刀第3胎，發生車禍真係可大可小㗎嘛。如果有事，隊佢嗰位粗心大意嘅司機就做咗國家罪人嘞。報道就冇講軍刀有冇向黑色車司機索償，不過以佢呢排心情咁靚，可能都會係小事當無。
舒夫真高同姬絲汀都可算係球壇模範夫妻，之前已經生咗兩個囝囝，而且添丁前後，軍刀都有好事發生。好似04年姬絲汀生第1胎，改咗個名叫佐敦，喺嗰個球季，AC米蘭就贏得03/04意甲冠軍；06年姬絲汀添第2胎，改名叫基士堤，軍刀就完成人生第1次世界盃，仲幫烏克蘭打入8強，算有交代。今次姬絲汀懷有第3胎，唔通真係保佑到軍刀贏到歐國盃？