次輪開打，果然變激，睇波蘭迎俄羅斯頭70分鐘，好似世界大戰；今晚C組波，原本早鎖定克羅地亞下盤加W，但1哥西班牙更似穩食魚腩愛爾蘭，[-1]有1.8倍，1哥肯現真身，入球騷可期。
各隊嘅真面目，第二輪一定會見得更多；前文提過望主辦國波蘭能改善推進節奏，將威力平均發揮喺90分鐘比賽；結果佢哋周二晚喺落後情況下扳平，即同俄軍齊收夠籌，好似怕邊隊輸波後發生球迷大暴亂咁，小弟博冷W失手，冇怨言。純計發揮，波蘭仗比仗好，下戰鬥捷克，平/半上盤可早買，贏唔到出線都唔似輸畀你。俄羅斯果然係爭標黑馬，不過捷克冇路斯基表現即跌watt；但前者就咪信晒另一位仲係阿仙奴人嘅艾沙維。波蘭能反客為主，多得佢老哥莫氣兼從來唔助守，雲格棄之逐回祖國，有道理㗎。
今晚重心，原定係嗱住3分喺手、慢慢同你打反擊嘅克羅地亞，力足再擒褪色意軍；後者上次畀西班牙逼和，譽滿欄邊。不過提防因狂牛未盡全力，意軍得以喺有限人腳，發揮到有威力嘅突擊，今鋪要焗攻，小心克軍打突擊比上仗圍揼愛爾蘭時更勁。下盤加W從冇動搖過，亦懶理意軍2.2倍W似好筍，小弟自己演繹係莊家都唔睇好，東歐隊今季暫時盤路幾好㗎。
但講信心，莊家同波友一樣，今日必向狂牛圍飛；上次冇鋒陣兼賴地硬，今次遇見呢隊越睇越似英超下游聯軍嘅愛爾蘭，老查話出埋約拿芬禾達斯打雙箭頭，聽到都想笑，就博佢哋破到蛋；玩波膽好分好多，又可減低齊捧大熱齊失手嘅風險，希望醜嘅唔靈啦。
文：蘋果波神
今日心水
熱：西班牙[-1]
冷：克羅地亞W