亞視（ATV）新方向似乎唔係拍劇，而係拍懸疑片。猶記得上月母親節，亞視搵嚟蔡國威拍宣傳片，一哭二叫三搣橙，矇矓畫面加哀愁配樂，似拜山多過似頌親恩。雖然俾班高登仔鬧爆九唔搭八，但至少拍咗有人講，同埋起碼係原創，新紮職做製作總監嘅蔡錦豐居功至偉。嚟緊父親節，蔡總又獻新猷，搵兩個素人嚟拍宣傳片，仲將佢哋打扮成毒男咁款，唔知係咪影射高登仔呢？
以為賣飯煲廣告
題目為《禮物》嘅宣傳片長約1分鐘，起首鏡頭就見到男主角探頭入電飯煲，其黑色粗膠框眼鏡、着裇衫扣到上頸、同埋烚熟笑容，完全係典型毒男setup。見佢拎住個煲上街，喺人群中閃閃縮縮，騎騎呢呢搞完一大輪，終於入到郊區，見到父親大人，原來又係毒男嚟！跟住老竇話停電，阿仔於是用拖板拉線駁電，最後成功將飯煲熟。如果唔係個毒男臨尾口窒窒咁講咗句：「阿爸，父親節快樂。」觀眾仲以為佢賣緊電飯煲廣告。
蔡錦豐噚日否認呢條父親節片係向高登仔報復，佢話：「絕對唔係，我哋只係從孝順仔角度，個孝順仔斯斯文文，完全冇宅男呢個因素。我同好多父親傾過，無論送乜嘢都好，最重要係有餐安樂茶飯啫，所以最後message話同個仔食飯已經好心滿意足。」